Pavlodar oblysyndaǵy B. Ahmetov atyndaǵy joǵary pedagogikalyq kolledjdiń arnaiy pánder oqytýshysy Gúlmira Meshitbaeva halyqaralyq ETF New Learning Award 2026 kásibi baiqaýynda bedeldi INSPIRATION AWARD syilyǵyn jeńip aldy, dep habarlaidy ult.kz.
ETF New Learning Award – bilim berý salasyndaǵy ozyq tájiribelerdi anyqtaýǵa jáne taratýǵa baǵyttalǵan halyqaralyq bastama. Baiqaý álemniń ártúrli elderinen kelgen pedagogterdiń tájiribe almasýyna múmkindik beredi.
Gúlmira Meshitbaeva baiqaýǵa «Bastaýysh bilim berý» mamandyǵy stýdentterin daiarlaýda qoldanylatyn SCAFFOLD kartalary boiynsha tájiribesin usyndy. Bul ádisteme stýdentterdiń tsifrlyq tehnologiialardy tiimdi paidalanýyna jol ashty. Nátijesinde olar beinematerialdar men túrli deńgeidegi tapsyrmalardy qamtityn bilim berý jobalary men saittaryn ázirledi.
Jobalar bastaýysh synyp oqýshylaryn oqytýda zamanaýi tásilderdi qoldanýǵa kómektesedi. Sondai-aq pedagogterge ádistemelik qoldaý kórsetip, ata-analarǵa praktikalyq usynymdar usynady.
Aita ketý kerek, SCAFFOLD tehnologiiasy Qazaqstanda DARYA SCAFFOLD pilottyq jobasy aiasynda engizilgen. B. Ahmetov atyndaǵy joǵary pedagogikalyq kolledj bul jobaǵa 2024 jyldyń qyrkúieginen bastap qatysyp keledi. Kolledj stýdentteri atalǵan ádistemeni oqý barysynda meńgerip, pedagogikalyq praktika kezinde mektepterde qoldanýda.
Halyqaralyq sarapshylar qazaqstandyq pedagogtiń tájiribesin joǵary baǵalady. Nátijesinde jumys «Scaffold quraldaryn paidalaný arqyly muǵalimderdiń múmkindikterin keńeitý» nominatsiiasynda INSPIRATION AWARD syilyǵyna laiyq dep tanyldy.
Gúlmira Meshitbaevaǵa óz tájiribesin Belgiianyń Briýssel qalasynda ótetin halyqaralyq konferentsiiada tanystyrý múmkindigi berildi.
