Qazaqstanda gazdyń resýrstyq bazasyn keńeitý jáne jańa ken oryndaryn igerý baǵytyndaǵy jumystar qarqyn alyp keledi. Bul týraly «QazMunaiGaz» UK AQ basqarma tóraǵasy Ashat Hasenov Úkimet otyrysynda málimdedi, dep habarlaidy ult.kz.
Onyń aitýynsha, jumystar Memleket basshysynyń gaz qoryn ulǵaitý jáne geologiialyq barlaý jobalaryn iske asyrý jónindegi tapsyrmalaryn oryndaý aiasynda júrgizilýde.
Ashat Hasenov Atyraý oblysyndaǵy «Qaraton Tuzasty» jobasy boiynsha 2025 jyly tereńdigi 5 750 metr bolatyn barlaý uńǵymasy burǵylanǵanyn aitty. Birinshi jáne ekinshi nysandardy synaý barysynda gaz aǵyny alynǵan. Qazirgi ýaqytta úshinshi nysandy synaýǵa daiyndyq jumystary júrip jatyr. Barlyq synaq aiaqtalǵannan keiin ken ornynyń qoryn rastaý múmkindigi baǵalanatyn bolady.
Sonymen qatar biylǵy jyldyń sońyna deiin atalǵan joba aiasynda tereńdigi 6 myń metr bolatyn ekinshi uńǵymany burǵylaý bastalady dep josparlanyp otyr.
Budan bólek, «QazMunaiGaz» Mańǵystaý oblysynda «Bolashaq» jobasyn júzege asyrýda. Osy joba aiasynda biylǵy úshinshi toqsannyń sońyna deiin tereńdigi 3 500 metr bolatyn alǵashqy izdeý uńǵymasyn burǵylaý kózdelgen.
Sondai-aq kompaniia «Jylyoi» jáne «Berezovskii» jańa jobalary boiynsha qytailyq iri seriktester – CNOOC jáne Sinopec kompaniialarymen kelisimsharttar jasaǵan. Ashat Hasenovtiń aitýynsha, atalǵan jobalar aiasyndaǵy seismikalyq barlaý jumystary osy jyldyń kúzinde bastalady.
