Álemge tanymal Dota 2 oiynshylary men jetekshi halyqaralyq komandalar Astanada 1 million AQSh dollary kólemindegi júlde qory úshin tartysqa túsedi. Týrnir 2026 jylǵy 29 shilde - 9 tamyz aralyǵynda ótetin halyqaralyq mýltisporttyq «Bolashaq oiyndary – 2026» aiasynda uiymdastyrylady, dep habarlaidy ult.kz.
Jeńis jolynda Qytai, Qazaqstan, Ońtústik-Shyǵys Aziia, Ońtústik Amerika, Shyǵys Eýropa jáne ózge de óńirlerden kelgen 16 komanda baq synaidy. Qatysýshylar qatarynda álem chempiondary, The International týrniriniń finalisteri, sondai-aq halyqaralyq deńgeidegi eń iri jarystarda tanylǵan tájiribeli kibersportshylar bar.
Dota 2 - derbes kompiýterge arnalǵan MOBA (Multiplayer Online Battle Arena) janryndaǵy komandalyq strategiialyq oiyn. Ár matchta bes oiynshydan quralǵan eki komanda virtýaldy alańda ózara baq synaidy. Jeńiske jetý úshin oiynshylar qarsylastyń negizgi bazasyn joiyp, óz bazasyn qorǵaýy tiis. Bul oiyn strategiialyq oilaý qabiletin, úilesimdi komandalyq jumysty jáne jedel sheshim qabyldaýdy talap etedi.
Qazaqstan namysyn týrnirde elimizdiń jetekshi Dota 2 komandalarynyń biri Rune Eaters qorǵaidy. Komanda quramynda Daniial Álibai (xsvampire), Ábdimálik Sailaý (Malik), Álim Bespaev (aik), Aibek Toqaev (naive-) jáne Nikita Ostahov (Nicky`Cool) óner kórsetedi. Astanada qazaqstandyq komanda jergilikti jankúierlerdiń qoldaýymen álemniń myqty ujymdaryna qarsy oinaidy.
Týrnirdiń toptyq kezeńinde 16 komanda tórt topqa bólinedi. Ár toptaǵy tórt komanda tartysqa túsedi. Kezdesýler best-of-three formatynda ótedi, iaǵni eki oiynda jeńiske jetken komanda kelesi kezeńge joldama alady.
Plei-off kezeńi tikelei irikteý júiesimen uiymdastyrylady: seriiada jeńilgen komanda jarysty aiaqtaidy. Al grand-finalda komandalar úsh ret jeńiske jetkenge deiin oinaidy. Osylaisha chempion eń kóbi bes oiynnyń qorytyndysy boiynsha anyqtalady.
MOBA PC distsiplinasy boiynsha Dota 2 týrniri 2-5 tamyz aralyǵynda Astanadaǵy Jaqsylyq Úshkempirov atyndaǵy Jekpe-jek saraiynda ótedi.
