2026 jyldyń sáýir-mamyr ailarynda Ulttyq qaýipsizdik komiteti tergegen qylmystyq ister boiynsha terrorizm jáne ekstremizmge qatysty qylmystar jasaǵany úshin 13 adam túrli merzimge bas bostandyǵynan aiyryldy, dep habarlaidy ult.kz.
UQK málimetinshe, sottalǵandardyń biri – Astana qalasynyń turǵyny. Ol áleýmettik jeliler arqyly terroristik ideologiiany nasihattap, azamattardy terroristik belsendilik aimaqtaryna barýǵa úgittegen. Sot ony 8 jylǵa bas bostandyǵynan aiyrý týraly úkim shyǵardy.
Sondai-aq Shymkent qalasynyń týmasy terrorizm ideialaryn taratyp, Qazaqstan aýmaǵynda teokratiialyq memleket qurýǵa shaqyrǵany úshin kináli dep tanyldy. Sot sheshimimen ol 7 jylǵa sottaldy.
Budan bólek, osy kezeńde Astana, Almaty jáne Shymkent qalalarynda, sondai-aq Atyraý, Aqtóbe, Jambyl, Qaraǵandy, Túrkistan jáne Abai oblystarynda ekstremizm men terrorizmge qatysty qylmystar jasady degen kúdikpen 11 adam ustalǵan.
Olardyń arasynda eki shetel azamaty jáne shetelden ekstraditsiialanǵan úsh Qazaqstan azamaty bar. Tergeý nusqasyna sáikes, kúdiktiler internette jáne óz ortasynda ekstremistik materialdar taratyp, azamattardy terroristik belsendilik aimaqtaryna barýǵa, sondai-aq óz kózqarastarymen kelispeitin adamdarǵa qarsy zorlyq-zombylyq jasaýǵa úndegen.
Qazirgi ýaqytta atalǵan faktiler boiynsha Qylmystyq kodekstiń tiisti baptarymen sotqa deiingi tergep-tekserý amaldary júrgizilip jatyr.
