Qazaqstanda memlekettik tildegi ádebietke qyzyǵýshylyq artyp keledi. Sońǵy bir jylda kópshilik kitaphanalary arqyly oqyrmandarǵa 53,4 million qazaq tilindegi basylym berilgen, dep habarlaidy ult.kz.
Resmi málimetke sáikes, bir jyl ishinde kitaphanalardan jalpy 88,9 million basylym oqyrman qolyna tigen. Onyń 53,4 milliony, iaǵni 60,1 paiyzy qazaq tilindegi ádebietterge tiesili.
Bul úrdis kitaphana qorlarynyń tolyǵýynan da baiqalady. Sońǵy bir jylda kópshilik kitaphanalarynyń qoryna 906,5 myń jańa basylym túsken. Onyń 662,3 myńy nemese basym bóligi qazaq tilindegi kitaptar.
Qazirgi tańda elimizdiń kópshilik kitaphanalaryndaǵy qazaq tilindegi ádebietter qory 30,3 million danaǵa jetip, jalpy kitap qorynyń 41,7 paiyzyn qurap otyr.
Oqyrmandar arasynda eń kóp suranysqa ie baǵyt – kórkem ádebiet. Kórkem shyǵarmalar, til bilimi men ádebiettaný salasyndaǵy eńbekterge berilgen kitaptardyń sany 51,3 million danany nemese barlyq berilgen basylymnyń 57,6 paiyzyn qurady.
Sondai-aq jańa túsken ádebietterdiń ishinde de osy baǵyttaǵy kitaptar basym. Bir jylda kitaphana qorlary kórkem ádebiet, til bilimi jáne ádebiettaný salasyndaǵy 577,7 myń jańa basylymmen tolyqqan. Bul barlyq jańa túsimniń 63,7 paiyzyna teń.
Kópshilik kitaphanalarynyń negizgi oqyrmandarynyń qatarynda balalar men jastar bar. Búginde kitaphana paidalanýshylarynyń ishinde 15 jasqa deiingi 1,75 million bala, 1,38 million jas, sondai-aq 2,4 million eresek oqyrman tirkelgen.
Óńirler arasynda kitap oqityn turǵyndardyń úlesi boiynsha Pavlodar oblysy kósh bastap tur. Munda turǵyndardyń 47 paiyzy kitaphana qyzmetin paidalanady. Odan keiin Soltústik Qazaqstan oblysy – 45 paiyz, Batys Qazaqstan oblysy – 42 paiyz kórsetkishpen ornalasqan.
Mamandardyń pikirinshe, bul kórsetkishter kópshilik kitaphanalarynyń mádeni-aǵartýshylyq keńistiktegi róliniń artyp kele jatqanyn kórsetedi. Qazaq tilindegi ádebietke suranystyń ósýi, kórkem shyǵarmalardyń keńinen oqylýy jáne balalar men jastardyń kitap oqýǵa qyzyǵýshylyǵy elimizde oqý mádenietiniń nyǵaiyp kele jatqanyn ańǵartady.
