Qazaqstanda gýmanoid robottardy óndirý jobasy qolǵa alynady. Joba robototehnika, jasandy intellekt jáne ónerkásiptik óndiristi biriktirip, eldegi injenerlik jáne tehnologiialyq quzyretterdi damytýǵa baǵyttalǵan, dep habarlaidy ult.kz.
Bul týraly Astanadaǵy Alem.ai alańynda ótken Qazbot Robotics Forum barysynda aityldy. Is-sharaǵa memlekettik organdardyń, joǵary oqý oryndarynyń, tehnologiialyq kompaniialar men sarapshylardyń ókilderi qatysty.
Joba gýmanoid robottar jáne Embodied AI salasyndaǵy sheshimderdi ázirleitin halyqaralyq AgiBot kompaniiasymen birlesip júzege asyrylady. Yntymaqtastyq aiasynda tehnologiialardy Qazaqstanda lokalizatsiialaý, injenerlik kadrlardy daiarlaý, ǵylymi zertteýler júrgizý jáne qajetti mamandardy oqytý josparlanyp otyr.
QR Ǵylym jáne joǵary bilim ministri Saiasat Nurbektiń aitýynsha, Qazaqstannyń maqsaty – daiyn tehnologiialardy satyp alýmen shektelmei, el ishinde ózindik injenerlik jáne ǵylymi baza qalyptastyrý.
«Gýmanoid robottar óndirisi ýniversitetter, ǵalymdar men indýstriiany birtutas tehnologiialyq tizbekke biriktiretin alańǵa ainalýy tiis», – dedi ministr.
Qazir Qazaqstannyń joǵary oqý oryndarynda robototehnika, mehatronika, ónerkásiptik avtomattandyrý, intellektýaldy júieler jáne jasandy intellekt baǵyttary boiynsha 56 bilim berý baǵdarlamasy iske asyrylyp jatyr.
Jobaǵa Nazarbaev Ýniversitetiniń Aqyldy júieler jáne jasandy intellekt institýty (ISSAI) da qosyldy. Institýt gýmanoid robototehnika salasyndaǵy ǵylymi jáne júielik integratsiialyq seriktes retinde jumys isteidi.
Taraptar injenerlik kadrlar daiarlaý, beiindi zerthanalar ashý, birlesken ǵylymi zertteýler júrgizý jáne stýdentter men ǵalymdardy gýmanoid robototehnika jobalaryna tartý máselelerin talqylady.
Jobany júzege asyrý nátijesinde Qazaqstanda gýmanoid robottardy ázirleý men óndirýdiń tolyq tehnologiialyq tizbegin qalyptastyrýǵa múmkindik beretin jańa injenerlik jáne ǵylymi quzyretterdi damytý kózdelip otyr.
