Qazaqstanda meditsinalyq infraqurylymdy jańǵyrtý jumystary qarqyn aldy. Qazirgi tańda elimizdiń ár óńirinde jalpy quny 108 mlrd teńgeni quraityn 51 densaýlyq saqtaý nysanynyń qurylysy qatar júrgizilýde, dep habarlaidy ult.kz.
Densaýlyq saqtaý ministrliginiń málimetinshe, qarjynyń 55 mlrd teńgesi «Aýyldyq densaýlyq saqtaýdy jańǵyrtý» ulttyq jobasy aiasynda aýdandyq aýrýhanalardy jańǵyrtýǵa baǵyttalǵan. Al 53 mlrd teńge biýdjettik investitsiialyq jobalardy iske asyrýǵa bólingen.
Qazir Qyzylorda men Óskemende 300 oryndyq kópbeiindi aýrýhanalar, Atyraý oblysyndaǵy Órken jáne Nursaia shaǵyn aýdandarynda emhanalar, Soltústik Qazaqstan oblysynyń Beskól aýylynda táýligine 250 adam qabyldaityn jáne Taldyqorǵanda bir aýysymda 500 adamǵa qyzmet kórsetetin emhanalar salynýda.
Sonymen qatar 2026 jyly Arnaýly memlekettik qor qarajaty esebinen qarjylandyrylǵan birqatar nysan paidalanýǵa beriledi. Olardyń qatarynda Qaraǵandydaǵy onkologiialyq dispanser, Taldyqorǵandaǵy oblystyq balalar aýrýhanasynyń jańǵyrtylǵan ǵimaraty, Jetisý oblysyndaǵy Kerbulaq aýdandyq aýrýhanasy jáne Óskemendegi Gematologiia ortalyǵy bar.
Josparǵa sáikes, 2026 jyldyń sońyna deiin 32 aýdandyq aýrýhana jańǵyrtylyp, zamanaýi kópbeiindi aýdandyq ortalyq aýrýhanalar deńgeiine jetkiziledi. Bul mekemeler kompiýterlik tomograftar, angiografiialyq keshender jáne basqa da joǵary tehnologiialyq meditsinalyq jabdyqtarmen qamtamasyz etiledi. Mundai jańǵyrtý insýlt pen infarkt kezinde naýqastarǵa der kezinde kómek kórsetý múmkindigin arttyryp, júrek-qan tamyrlary aýrýlary men insýltten bolatyn ólim-jitimdi shamamen 20 paiyzǵa tómendetýge yqpal etedi.
Sondai-aq memlekettik-jekeshelik áriptestik aiasynda Kókshetaýda 630 oryndyq, Qosshyda 350 oryndyq kópbeiindi aýrýhanalar jáne Almatyda jańa meditsinalyq keshenniń qurylysy jalǵasýda.
Budan bólek, Memleket basshysynyń tapsyrmasyna sáikes, 2029 jylǵa deiin Astana, Almaty, Shymkent, Qaraǵandy, Qaskeleń, Qyzylorda, Oral jáne Túrkistan oblysynyń Temirlan aýylynda barlyǵy 9 jańa perinataldyq ortalyq salý josparlanǵan. Bul jobalar ana men bala densaýlyǵyn qorǵaý qyzmetiniń sapasyn arttyrýǵa jáne halyqqa kórsetiletin meditsinalyq kómektiń qoljetimdiligin keńeitýge baǵyttalǵan.
