Qazaqstanda baǵasy 10–15 million teńge aralyǵyndaǵy jańa avtokólikterge degen suranysqa qatysty jańa zertteý jariialandy, dep habarlaidy ult.kz.
Sarapshylar 2025 jyl boiy Kolesa.kz platformasyndaǵy paidalanýshylardyń qyzyǵýshylyǵyn saralap, Almatyda ótken «Jańa avtokólikter» konferentsiiasynda osy baǵa sanatyndaǵy eń suranysqa ie modelderdiń tizimin usyndy.
Resmi dilerlik ortalyqtardyń satylymyna qaraǵanda, bul segmentte burynnan Hyundai Tucson men Kia Sportage kósh bastap keledi. Alaida jeke importtaýshylardyń usynystary eskerilgende, satyp alýshylardyń tańdaýy ózgeshe bolyp shyqty.
1-oryn – Deepal S07
Baǵasy 10–15 mln teńge aralyǵyndaǵy eń tanymal jańa kólik – Deepal S07 boldy. Bul model Qazaqstanda gibridti jáne tolyq elektrli nusqalarda satylǵanymen, satyp alýshylar kóbine gibridti túrin tańdaǵan.
Kólik 1,5 litrlik 96 at kúshine ie benzin qozǵaltqyshymen jáne artqy oske ornatylǵan 241 at kúshindegi elektrmotorymen jabdyqtalǵan. Elektr qýatymen 121–200 shaqyrymǵa deiin júre alady, al óndirýshi málimdegen jalpy júris qory 1280 shaqyrymdy quraidy. Degenmen Kolesa.kz redaktsiiasynyń synaqtary naqty kórsetkishtiń budan tómen ekenin kórsetken.
2-oryn – Changan CS55 Plus
Ekinshi orynǵa Changan CS55 Plus turaqtady. Bul krossover Qazaqstandaǵy resmi dilerlerde 10,5–11 mln teńge aralyǵynda satylady. Al restailingke deiingi nusqasynyń baǵasy 9,3–10 mln teńgeni quraidy.
Eki nusqa da 181 at kúshindegi 1,5 litrlik týrboqozǵaltqyshpen jáne 7 satyly robottandyrylǵan berilis qorabymen jabdyqtalǵan.
Sonymen qatar jeke importtaýshylar Qytai naryǵyna arnalǵan jańartylǵan býynyn da usynýda.
3-oryn – Kia Sportage
Úzdik úshtikti Kia Sportage túiindedi. Bul model resmi avtosalondardaǵy satylymda da kóshbasshylar qatarynda.
Qazaqstanda negizinen Qostanaida qurastyrylǵan Sportage satylsa, jeke import arqyly Qytaidan jetkizilgen Sportage Ace nusqalary da kezdesedi. Bul model syrtqy kelbetimen ǵana emes, kólemi jaǵynan da erekshelenedi. Onyń uzyndyǵy men dońǵalaq bazasy kádimgi Sportage-ke qaraǵanda yqsham.
Qytailyq nusqalar 200 at kúshindegi 1,5 litrlik týrbomotor nemese 161 at kúshindegi 2 litrlik atmosferalyq qozǵaltqyshpen usynylady. Baǵasy 11,7 mln teńgeden bastalady.
4-oryn – Changan CS75 Plus
Tórtinshi orynda Changan CS75 Plus ornalasqan.
2026 jylǵy shyǵarylymdaǵy bul model resmi dilerlerde 11,6–14 mln teńge aralyǵynda baǵalanady. Ol 181 at kúshindegi 1,5 litrlik týrbomotor nemese 235 at kúshindegi 2 litrlik qozǵaltqyshpen usynylady. Qýatty nusqasy tolyq jetekpen jabdyqtalǵan.
Parallel import arqyly jetkizilgen kólikterdiń baǵasy shamamen 10 mln teńgeden bastalady jáne keibir nusqalary budan da arzan.
5-oryn – Kia Seltos
Al alǵashqy bestikti Kia Seltos qorytyndylady.
Bul krossoverdi resmi dilerlerden de, jeke importtaýshylardan da satyp alýǵa bolady. Qazaqstanda qurastyrylǵan nusqalary 2 litrlik qozǵaltqyshpen jáne variatormen jabdyqtalyp, baǵasy 11–13,5 mln teńge aralyǵynda.
Al Qytaidan jetkiziletin Seltos 1,5 litrlik qozǵaltqyshpen, aldyńǵy jetekpen jáne CVT berilis qorabymen usynylady. Onyń baǵasy 10,2 mln teńgeden bastalady. Alaida 2026 jyly mundai kólikterdiń satylymdaǵy sany aitarlyqtai azaiǵan.
