Búgin QR Aqparat jáne qoǵamdyq damý ministrliginiń qoldaýymen «Qazaqstan» telearnasy túsirgen 12 bólimdi «Sarai syry» telehikaiasy efirge shyǵady. Telehikaia 1823-1845 jyldary Bókei Ordasynda bilik qurǵan tarihi tulǵa Jáńgir hanǵa qatysty oqiǵalarǵa negizdelgen, dep habarlaidy QazAqparat.
Týyndyda Jáńgir hannyń tulǵasy XVIII ǵasyrdyń sońy men XIX ǵasyrdyń ortasynda Bókei ordasynyń tarihynda bolǵan oqiǵalar jelisi arqyly kórsetiledi. Saiasi arenadaǵy rólimen birge, halyqty bilimge tartýǵa baǵyttalǵan bastamalary, qazaq dalasyna batys órkenietiniń kelýine sebepker bolýy, bileýshi saraiyndaǵy ishki ómiri telehikaianyń negizgi ideiasy retinde alyndy.
«Orynbor jáne Ýfa qalalary múftiiniń qyzy Fatima hanshanyń Han ordasyna kelip túsýimen hikaiadaǵy shytyrman oqiǵalar jańa ópic alady. Handyqtyń sońǵy jyldarynda Isatai men Mahambettiń tulǵasyna qatysty shieleniske toly tarihi oqiǵalar da qamtylǵan. Bul oqiǵalardyń kópshiligi tarihi shyndyq bolǵanymen, telehikaiada kórkem shyǵarmaǵa tán stilmen astasa beriledi», - deidi joba jetekshisi Arman Sqabyluly.
Telehikaianyń qoiýshy-rejisseri – Baqyttas Sanitas. Stsenarii avtorlary – Jámit Kósherbaev, Asqar Dúisenbi jáne Arman Sqabyluly. Telehikaianyń túsirilim jumystary Almaty oblysy men Almaty qalasynda ótti. Basty keiipker Jáńgir han rólin Medǵat Ómiráliev, Fatima rólin Ámina Mektepbaeva, Qazima rólin Zarina Karmen, Júzim rólin Ulbolsyn Shalqarova, Mahambet beinesin Darhan Súleimenov, Isatai rólin Nurlan Saǵynaev, Qali sultan rólin Farabi Ábsamatov somdap shyqty. Jáńgir hannyń anasy Atan hansha beinesinde Tynyshkúl Sultanberdieva oinady.
Akter Nurlan Saǵynaev kórermenge «Qazaqstan» telearnasy túsirgen «Abai» tarihi telehikaiasyndaǵy Ospan beinesi arqyly tanys bolsa, Darhan Súleimenov «Orbulaq shaiqasy» telehikaiasynda Qarasai batyrdyń rólimen belgili.
«Sarai syry» tarihi telehikaiasy «Qazaqstan» telearnasynan búginnen bastap dúisenbi-juma aralyǵynda 21:30-da efirge shyǵady.
