Astanada QR Prezidenti Ákimshiligi Basshysynyń birinshi orynbasary Erlan Karinniń tóraǵalyǵymen «Ejelgi dáýirden búgingi kúnge deiingi Qazaqstan tarihy» atty jańa akademiialyq jeti tomdyqtyń Jalpy redaktsiialyq alqasynyń qorytyndy otyrysy ótti. Jiyn barysynda kóptomdyqtyń sońǵy – «Táýelsiz Qazaqstan» atty jetinshi tomy maquldanyp, baspaǵa usyný týraly sheshim qabyldandy, dep habarlaidy ult.kz.
Joba Memleket basshysy Qasym-Jomart Toqaevtyń «Táýelsizdik bárinen qymbat» atty maqalasynda júktelgen mindetter aiasynda ázirlengen. Basylym Uly dalanyń myńjyldyq tarihyn keshendi zerdeleýge, qazaq memlekettiliginiń qalyptasýy men damý sabaqtastyǵyn ǵylymi turǵydan negizdeýge jáne ulttyq tarihty jańa zertteý ádisteri men tyń derekkózder negizinde qaita paiymdaýǵa baǵyttalǵan.
Erlan Karin bul táýelsiz Qazaqstan tarihyndaǵy eń iri ǵylymi jobalardyń biri ekenin atap ótti. Onyń aitýynsha, jeti tomdyq bir jyldyń ishinde daiyndalǵan. Jobaǵa 350-den astam qazaqstandyq jáne 12 elden kelgen 56 sheteldik ǵalym qatysqan.
Sondai-aq ol sońǵy jyldary Memleket basshysynyń bastamasymen Altyn Orda tarihyn zertteý baǵytynda aýqymdy jumystar atqarylǵanyn aitty. Atap aitqanda, Joshy han kesenesi mańyndaǵy ǵylymi ortalyqtyń qurylysy bastalyp, Joshy ulysyn zertteý institýty qurylǵan, al jeti tomdyqtyń jeke bir tomy Altyn Orda tarihyna arnalǵan.
Erlan Karinniń aitýynsha, kóptomdyqty ázirleý barysynda qalyptasqan ǵylymi tujyrymdar memlekettik deńgeidegi sheshimderge de negiz bolǵan. Sonyń biri – Qazaqstan Respýblikasy Konstitýtsiiasynyń preambýlasyna «Uly dalanyń myńdaǵan jyldyq murasyn saqtai otyryp» degen qaǵidanyń engizilýi.
Qorytyndy otyrysta Ǵylym jáne joǵary bilim ministri Saiasat Nurbek pen redaktsiialyq alqa músheleri jetinshi tomǵa engizilgen tolyqtyrýlar men túzetýlerdi talqylady. Buǵan deiin aitylǵan barlyq ǵylymi eskertýler eskerilip, qoljazba tolyq pysyqtalǵany atap ótildi.
Jiyn qorytyndysynda redaktsiialyq alqa akademiialyq jeti tomdyqtyń sońǵy tomyn baspaǵa usyný týraly sheshim qabyldap, jobaǵa qatysqan ǵalymdar men avtorlar ujymyna alǵys bildirildi.
