Qazaqstanda Halyqaralyq shahmat federatsiiasynyń (FIDE) qoldaýymen 2026 jyldyń eń iri týrnirleriniń biri – ýniversitetter arasyndaǵy komandalyq álem chempionatynyń finaly ótedi. Bul týraly Qazaqstan shahmat federatsiiasynyń prezidenti Timýr Týrlov málimdedi.
Timýr Týrlov óziniń avtorlyq baǵanynda atap ótkendei, FIDE World University Team Chess Championship 2026 tamyz aiynda Almaty qalasynda ótedi jáne ol jahandyq deńgeidegi stýdenttik shahmattyń naǵyz jańarýyna ainalmaq.
«Bul álemdik shahmattaǵy kásibi qaýymdastyqtyń 2021 jyldan beri kútken «stýdenttik formatty» tolyqqandy qaita paiymdaýy bolmaq. Esterińizge sala keteiin, sol jyly pandemiia kezinde 1st World University Online Rapid Championship ótken bolatyn, biraq ol tolyǵymen onlain formatta uiymdastyryldy. Endi bul format naǵyz jahandyq aýqymda qaita jańǵyryp, onyń sheshýshi kezeńin ótkizý bizge senip tapsyryldy», – dep jazdy QShF prezidenti.
Onyń aitýynsha, mamyr aiynda Soltústik jáne Ońtústik Amerika, Eýropa, Afrika jáne Aziia elderiniń jetekshi joǵary oqý oryndary baq synaǵan irikteý kezeńderi ótti.
Nátijesinde alǵashqy 8 qatysýshy anyqtaldy: Sent-Lýis ýniversiteti, Dallastaǵy Tehas ýniversiteti, Oral taý-ken ýniversiteti, Afiny ulttyq tehnikalyq ýniversiteti, Vebster ýniversiteti, Chili ýniversiteti, Gýnadarma ýniversiteti jáne ál-Farabi atyndaǵy Qazaq ulttyq ýniversiteti.
QShF prezidenti qalǵan 8 qatysýshynyń tikelei wild card alatynyn atap ótti. Búgingi tańda olar: Kembridj ýniversiteti, Oksford ýniversiteti, Garvard ýniversiteti, Pekin ýniversiteti jáne respýblikalyq irikteý arqyly joldama alǵan Qazaq ulttyq sport ýniversiteti. Taǵy úsh wild card iegeriniń aty keiinirek jariialanady.
Jalpy, Timýr Týrlovtyń aitýynsha, mundai deńgeidegi ýniversitettik týrnir, sportta ózin kórsetý jáne medaldar jeńip alý múmkindigi ǵana emes, sonymen qatar jańa akademiialyq bailanystar ornatýǵa jáne birlesken jastar jobalaryn iske qosýǵa berilgen múmkindik.
«Stýdenttik shahmatty «oiynǵa» qaita qosýǵa jáne osy jahandyq úderisti Qazaqstannyń belsendi rólin aiqyndaýǵa bul taptyrmas múmkindik ekeni qazirdiń ózinde túsinikti», – dep túiindedi ol.
