2026 jyldyń alǵashqy alty aiynda Qazaqstan men Qytai arasyndaǵy júk tasymalynyń kólemi 18,7 mln tonnaǵa jetip, ótken jyldyń sáikes kezeńimen salystyrǵanda 9%-ǵa artty. Bul týraly Kólik ministrligi habarlady.
Osy kezeńde Qytaidan Qazaqstanǵa 7 mln tonna júk jetkizildi. Bul ótken jyldyń birinshi jartyjyldyǵynan 9%-ǵa kóp. Al Qazaqstannan Qytaiǵa 11,7 mln tonna júk jóneltilip, kórsetkish 10%-ǵa ósti.
Eksporttyq tasymal kólemi erekshe qarqyn kórsetti. Qytaiǵa jóneltilgen ken, qurama jem, qara jáne tústi metaldar, astyq, munai jáne munai ónimderi sekildi júkterdiń jalpy kólemi 8,5 mln tonnany qurap, bir jylda 20%-ǵa artqan.
Júk ainalymynyń ósýine shekaralyq ótkelderdiń jumysy aitarlyqtai yqpal etti. Dostyq shekaralyq ótkeli arqyly alty aida 10,6 mln tonna júk tasymaldanyp, ótken jyldyń sáikes kezeńimen salystyrǵanda 15%-ǵa kóbeidi. Bul baǵyttaǵy eksport kólemi de 15%-ǵa ósip, 5,4 mln tonnaǵa jetti.
Altynkól shekaralyq ótkeli arqyly 8,1 mln tonna júk ótkizildi. Bul ótken jyldyń birinshi jartyjyldyǵynan 2%-ǵa joǵary. Al atalǵan stantsiia arqyly eksporttyq tasymal 29%-ǵa ósip, 3,1 mln tonnany qurady.
Kólik ministrliginiń málimetinshe, júk tasymaly kóleminiń artýyna Qazaqstan men Qytai temirjol ákimshilikteriniń birlesken jumysy, shekaralyq infraqurylymdy jańǵyrtý jáne ótkizý qabiletin kezeń-kezeńimen arttyrý yqpal etken.
Jalpy, Dostyq pen Altynkól ótkelderi Qazaqstan men Qytai arasyndaǵy ǵana emes, Aziia men Eýropany jalǵaityn halyqaralyq kólik dálizderiniń mańyzdy logistikalyq toraptary retinde júk tasymalynyń turaqty ósimin qamtamasyz etip otyr.
