«Qazaqstan» teleradiokorporatsiiasy otandyq kásipqoi boksshylarymyzdyń jekpe-jekterin «Qazaqstan» jáne «Qazsport» telearnalarynda kórsetý quqyǵyna ie boldy, dep habarlaidy QazAqparat.
«4 qarasha kúni AQSh-tyń Tehas shtatyndaǵy El-Pasodaǵy Don Haskins Convention Center kesheninde qazaq boksshylary Jánibek Álimhanuly men Saǵadat Rahmanqul boks keshiniń andekartynda sharshy alańǵa shyǵady. Basty jekpe-jek meksikalyq Migel Berchelt (34-1, 30 KO) pen Migel Roman (60-12, 47 KO) arasynda ótedi» delingen korporatsiia taratqan habarlamada.
Bul - Jánibek Álimhanulynyń (3-0, 1 KO) kásipqoi bokstaǵy tórtinshi jekpe-jegi. Onyń qarsylasy - 32 jastaǵy amerikalyq bylǵary qolǵap sheberi Von Aleksandr (12-1, 8 KO). Al, Saǵadat Rahmanqul (3-0, 1 KO) pýerto-rikalyq Niklaýs Flazben (5-1, 4 KO) qolǵap túiistiredi.
Aita keteiik, Jánibek Álimhanulynyń áýesqoi boksta qol jetkizgen jetistikteri bir tóbe. Ol - álem jáne Aziia chempiony, Aziia oiyndarynyń jeńimpazy, Qazaqstannyń birneshe dúrkin chempiony. 2018 jyly Jánibek kásipqoi boksqa aýysyp, 3 jekpe-jek ótkizip úlgerdi. Barlyǵynda jeńiske jetip, bireýin nokaýtpen aiaqtady. Al, qarsylasy Von Aleksandr kásipqoi boksta 13 jekpe-jek ótkizip, 12-sinde jeńiske jetken. 8 kezdesýin nokaýtpen aiaqtaǵan. Saǵadat Rahmanqul áýesqoi boksta 69 kelige deiingi salmaqta 2013 jyly el birinshiliginde top jaryp, al 2014 jyly kúmis júldeger atanǵan bolatyn.
Otandastarymyzdyń jekpe-jekterin «Qazaqstan» men «Qazsport» telearnalary 4 qarasha kúni, saǵat 04:00-de tikelei efirde kórsetedi.
