Erteń Japoniiada XX jazǵy Aziia oiyndary aiaqtalady. Qazaqstan quramasy 84 medal (12 altyn, 24 kúmis jáne 48 qola) oljalap, 46 eldiń ishinde jalpykomandalyq esepte segizinshi orynǵa turaqtady, dep habarlaidy ult.kz.
2023 jyly Hanchjoýda ótken Aziia oiyndarynda Qazaqstan 11-oryn alǵan edi. Osylaisha, ulttyq qurama aldyńǵy Aziadamen salystyrǵanda úsh saty joǵarylap, altyn medal sanyn arttyrdy.
Qazaqstan quramasy biylǵy Aziia oiyndarynda birqatar olimpiadalyq sport túrinen el tarihynda buryn-sońdy bolmaǵan nátijelerge qol jetkizdi.
Biylǵy Oiyndardyń basty jetistikteriniń biri retinde boksshylardyń 12 jyldyq úzilisten keiin Aziia oiyndarynyń altyn júldesin jeńip alǵanyn aitýǵa bolady. Buǵan deiin ulttyq qurama Aziada altynyn sońǵy ret 2014 jyly jeńip alǵan bolatyn. Keiingi eki Aziia oiyndarynda qazaqstandyq boksshylar chempion atana almady. Japoniiada 70 kelige deiingi salmaqta Tórehan Sabyrhan jáne 90 keliden joǵary salmaqta ulttyq qurama kapitany Aibek Oralbai chempion atandy.
Sapymen semserlesýden Qazaqstan erler quramasy Aziada tarihyndaǵy alǵashqy altyn medalin jeńip aldy. Finalda otandastarymyz Koreia Respýblikasynyń quramasyn 43:42 esebimen utty. Qarsylas komanda sapynda jekelei synda Rio-2016 Olimpiadasynyń chempiony atanǵan Pak San Ion da óner kórsetti. Bul jeńis qazaqstandyq semserlesýshiler úshin tarihi jeńisterdiń zańdy jalǵasy boldy. Ulttyq qurama áýeli Aziia chempionatynda top jaryp, keiin alǵash ret álem chempiony atandy, endi Aziia oiyndarynyń altynyn ielendi. Buǵan deiin bir maýsymda mundai nátijege eshbir qurama qol jetkizbegen.
Akademiialyq esýden Vladislav Iakovlev pen Ivan Chernýhin Qazaqstanǵa Aziia oiyndaryndaǵy alǵashqy altyn medaldi syilady. Olar erler arasyndaǵy qos eskekti qaiyq jarysynda jeńiske jetti.
Taekvondodan Tamirlan Tileýles 58 kelige deiingi salmaqta top jaryp, Qazaqstan tarihyndaǵy osy sport túrinen Aziadanyń tuńǵysh altyn medalin jeńip aldy.
Veloshabandoz Aleksei Lýtsenko da tarihi kórsetkishke qol jetkizdi. Ol jazǵy Aziia oiyndaryndaǵy altyn medaldarynyń sanyn altyǵa jetkizip, Aziadadaǵy jeńis sany boiynsha Qazaqstannyń eń ataqty sportshysyna ainaldy. Al Rinata Sultanova jekelei jarysta top jaryp, Qazaqstan áielder velosporty tarihynda Aziia oiyndarynyń altynyn jeńip alǵan alǵashqy sportshy atandy.
Karateden Jolaman Biǵabyl men Sofia Berýltseva el qorjynyna eki altyn medal saldy. Berýltseva úshin bul – Aziia oiyndaryndaǵy ekinshi chempiondyq ataq.
Aziia oiyndarynyń baǵdarlamasyna alǵash ret engen aralas jekpe-jekte de Qazaqstan birden úzdikter qatarynan kórindi. Erkinǵali Búrkitáli men Qadyrbek Shynbaev chempion atansa, Sanjar Ádilov qola medal ielendi.
Dziýdodan Qazaqstan quramasy alǵash ret jekelei synda tórt finalǵa shyqty. Eldos Smetov, Ábiba Ábýjaqynova, Ádilet Almat jáne Ajar Ashat finalda japoniialyq qarsylastaryna ese jiberip, kúmis júldeger atandy. Sondai-aq Ulttyq qurama aralas komandalyq synda da kúmis medal jeńip aldy. Qazaqstan qatysqan bes finaldyń barlyǵynda Japoniia balýandarymen beldesti.
Sporttyq gimnastikadan Milad Karimi erkin jattyǵýda kúmis júldege ie boldy. Osylaisha, Qazaqstan bul baǵdarlama boiynsha 32 jyldan keiin Aziia oiyndarynyń júldesine qaita qol jetkizdi.
Qazaqstandyq balýandardyń nátijesinde de oń ózgeris baiqaldy. Erkin kúresten ulttyq qurama úsh qola medal jeńip aldy. Al 2023 jylǵy Aziia oiyndarynda bul kúres túrinen Qazaqstan júldesiz qalǵan bolatyn.
Áielder kúresinde de nátije jaqsardy. Biyl sportshylarymyz bir kúmis jáne eki qola medal ielense, 2023 jyly bir ǵana kúmis júlde jeńip alǵan edi. Osylaisha, kúres Qazaqstannyń jalpy medal qoryna turaqty úles qosyp keledi. Qola júldeler sanynyń artýy qazaqstandyq balýandardyń Aziia deńgeiindegi básekege qabilettiligin kórsetedi.
Aziia oiyndary qarsańynda sport federatsiialary ulttyq quramalardyń nátijesine qatysty naqty mindettemeler bergen edi. Aziada qorytyndysy boiynsha Týrizm jáne sport ministrligi osy mindettemelerdiń oryndalýyna jan-jaqty taldaý júrgizedi.
Sondai-aq nátijeler aldyńǵy halyqaralyq jarystardaǵy kórsetkishtermen salystyrylyp, oǵan áser etken faktorlar saralanady.
Eger taldaý barysynda jekelegen sport túrlerindegi qazirgi daiyndyq júiesi kútken nátije bermegeni anyqtalsa, tiisti sheshimder qabyldanady. Qajet bolǵan jaǵdaida jekelegen federatsiialardaǵy jumys tásilderi tolyq qaita qaralýy múmkin.
Sonymen qatar jaýapty uiymdardyń halyqaralyq arenadaǵy jumysyn kúsheitý máselesi de qarastyrylady.
