«Qazaqmys korporatsiiasy» JShS men Ulytaý oblysynyń ákimdigi Jezqazǵan qalasynyń sport infraqurylymyn damytý boiynsha ózara túsinistik pen yntymaqtastyq týraly memorandýmdy rásimdedi. Qujatqa Ulytaý oblysynyń ákimi Eset Baiken men «Qazaqmys korporatsiiasy» JShS Basqarma tóraǵasy Rýslan Óskenáli qol qoidy, dep habarlaidy ult.kz.
Kelisim aiasynda Qazaqmys Ulytaý oblysynyń ákimdigimen birlesip, Jezqazǵan qalasynda 6 myń kórermenge arnalǵan jabyq fýtbol stadiony men zamanaýi tennis ortalyǵynyń qurylysyna qatysty eki iri jobany pysyqtaýǵa kirisedi. Bul bastamalar zamanaýi sport infraqurylymyn qalyptastyrýǵa, turǵyndardyń sportpen ainalysýyna jaǵdai jasaýǵa jáne balalar men jasóspirimder sportyn damytýǵa baǵyttalǵan.
«Jezqazǵan qalasynda jańa tennis ortalyǵy men 6 myń kórermenge arnalǵan stadion salýdy josparlaý jónindegi memorandýmǵa qol qoidyq. Bul nysandar qala turǵyndaryna, ásirese balalar men jastarǵa sportpen turaqty ainalysýǵa jańa múmkindikter beredi.
Jalpy, Memleket basshysynyń tapsyrmasyna sáikes, biyl jáne 2027 jyly óńirimizde 25-ten astam iri áleýmettik jáne injenerlik infraqurylym nysanynyń qurylysy bastalady. Bizdiń basty mindetimiz – oblysqa investitsiia tartý qarqynyn báseńdetpei, júzege asyrylyp jatqan jobalardyń naqty nátijesin halyqqa sezindirý», – dedi oblys ákimi Eset Baiken.
6 myń kórermenge arnalǵan jabyq fýtbol stadionyn 2027-2028 jyldary salý josparlanǵan. Jańa nysan jergilikti fýtbol komandalary men sport mektepteriniń jyl boiy jattyǵý ótkizip, oiyn uiymdastyrýyn qamtamasyz etedi. Sonymen qatar stadionda oblystyq jáne respýblikalyq deńgeidegi jarystardy ótkizýge jaǵdai jasalady. Stadionnyń ámbebap formaty aýa raiynyń qubylýyna qaramastan iri sporttyq, qoǵamdyq jáne mádeni is-sharalardy ótkizýge múmkindik beredi.
Zamanaýi tennis ortalyǵynyń qurylysy 2026-2028 jyldarǵa josparlanǵan. Joba aiasynda jabyq jáne ashyq tennis korttaryn, ákimshilik-turmystyq keshen, jattyǵý zaldaryn, sondai-aq sportshylarǵa meditsinalyq qoldaý kórsetýge jáne jattyǵýdan keiin qalpyna kelýine arnalǵan bólmeler salý kózdelgen. Ortalyq Jezqazǵanda balalar men jastar arasynda tennisti damytýǵa arnalǵan zamanaýi bazaǵa ainalyp, turaqty jattyǵý ótkizýge jáne jarys uiymdastyrýǵa jaǵdai jasaidy.
«Qazaqmys úshin Ulytaý oblysy – kompaniiaǵa qatysy bar negizgi óńirlerdiń biri. Bul jerde bizdiń jumyskerler ómir súrip, olardyń otbasy, bala-shaǵasy ósip-ónip jatyr. Sondyqtan biz úshin áleýmettik infraqurylymdy damytý men turǵyndarǵa jańa múmkindik syilaýdyń mańyzy zor. Bizdiń maqsatymyz – turǵyndarǵa qajetti jáne óńirdiń igiligi úshin uzaq jyldar boiy qyzmet etetin zamanaýi infraqurylym qalyptastyrý», – dedi «Qazaqmys korporatsiiasy» JShS Basqarma tóraǵasy Rýslan Óskenáli.
Qol qoiylǵan memorandým jobalardy praktikalyq turǵydan pysyqtaýdyń kelesi kezeńine jol ashady. Qazaqmys Ulytaý oblysynyń ákimdigimen birlesip, bolashaq nysandardyń negizgi tehnikalyq-ekonomikalyq talabyn, sáýlettik kelbeti men sipattamasyn aiqyndaidy.
2026-2027 jyldary Jezqazǵanda Qazaqmys kompaniiasynyń birqatar áleýmettik jáne infraqurylymdyq jańa jobalary júzege asyrylyp, iske qosylady. Olardyń qatarynda meshit pen Kongress-ortalyq salý, qoǵamdyq keńistikterdi abattandyrý, mádeniet nysandaryn jóndeý jáne Keńgir sý qoimasynyń jaǵalaýyn abattandyrý jáne t.b. jumystar bar. Fýtbol stadiony men tennis ortalyǵyn jobalaý kezeńi aiaqtalǵannan keiin, olardy qarjylandyrý kólemi kompaniianyń óńirdegi áleýmettik investitsiiasynyń jalpy biýdjetine qosymsha engiziledi.
Jobalardy iske asyrý Qazaqmystyń ózine qatysy bar óńirlerdegi áleýmettik infraqurylymdy damytýǵa, turǵyndardyń sportpen shuǵyldanýyna jáne belsendi ómir saltyn ustanýyna jaǵdai jasaýǵa, sondai-aq jas urpaqty damytýǵa baǵyttalǵan júieli jumysynyń bir bóligi bolmaq.
