«QazaqGaz» ulttyq kompaniiasyn reformalaý kerek. Bul týraly Senattyń jalpy otyrysynda depýtat Erik Sultanov málim etti, dep habarlaidy QazAqparat.
Osy oraida ol Premer-Ministr Álihan Smaiylovtyń atyna joldaǵan depýtattyq saýalynda elimizdiń gaz salasyndaǵy problemalar jáne olardy sheshý joldary týraly aityp berdi. Depýtat gaz tasymaly júiesiniń tozýy men elimizdegi gazben qamtamasyz etý kórsetkishiniń tómendigi jáne gaz baǵasyn qalyptastyrýdyń ashyqtyǵyna alańdaýshylyq bildirdi. Senator osyǵan bailanysty salany basqarý júiesin ózgertýdi, atap aitqanda «QazaqGaz» ulttyq kompaniiasyn reformalaýdy usyndy.
Senator resýrs bazasyn tolyqtyrý úshin jer qoinaýyn paidalanýshylardy jańa gaz jobasyn iske asyrýǵa yntalandyrý sharalaryn ázirleýdi usyndy. Gazǵa baǵa belgileý protsesiniń ashyqtyǵy men óńirlerdi gazdandyrý jónindegi búgingi kúnniń ahýalyna sáikes keletin jańa jospar qurý da mańyzdy.
«Saryarqa» magistraldyq gaz qubyry qurylysynyń baiaý júrip jatqanyn ekenin eskere kelgende, buryn josparlanǵandai 2025 jylǵa qarai soltústik óńirlerdi gazdandyrýdy aiaqtaý múmkin bolmaityny anyq. Búgingi tańda gazdyń bolmaýy investitsiia tartý, jańa óndiris ashý, halyqty jumyspen qamtý jáne jalpy el ekonomikasy men óńirlerdi damytý úshin basty tejeýshi faktorlardyń biri bolyp tabylady. Sondyqtan, qazirgi jaǵdaidy eskere otyryp, óńirlerdi gazdandyrýda ekonomikalyq jáne ulttyq qaýipsizdikti qamtamasyz etetin eń qolaily nusqany qarastyrý usynylady», - dedi depýtat Sultanov.
Senator osyǵan bailanysty Ministrler Kabinetiniń basshysyna gaz salasyn damytýdyń 2030 jylǵa deiingi keshendi josparyn bekitýdi jedeldetýdi usyndy jáne onda osy máselelerdiń bári kórinis tabýy tiis ekeni aityldy.
