Kollaj: ulysmedia.kz
Májilistegi Úkimet saǵatyna kelgen QazaqGaz-dyń qazirgi basshysy Sanjar Jarkeshov buǵan deiin ulttyq kompaniiadaǵy zańsyzdyqtar týraly sóz qozǵady. Depýtattar aldynda shyqqan ol «aýrýyn jasyrǵan aram óledi» degen maqaldy keltirip, buǵan deiingi zańsyzdyqtyń bárin ashyq aitýǵa daiyn ekenin málimdedi, dep habarlaidy Ulysmedia.kz portaly.
«Memleket basshysynyń tolyq aýdit uiymdastyrý jáne kompaniia qyzmetinde transparenttilikti qamtamasyz etý týraly tapsyrmalaryna sáikes, naqty jumys júrgizilip jatyr. Búgingi kúni, 937 mlrd teńgeden astam somaǵa deldaldyq shemalar men qarjylyq buzýshylyqtar tabylyp, onyń ishinen 123 mlrd teńgesi quqyq qorǵaý organdarymen anyqtaldy. Qazaqta aýrýyn jasyrǵan aram óledi degen jaqsy sóz bar. Barlyǵyn ashyq aitýǵa daiynbyz. Problema kóp, sheshýge tyrysyp jatyrmyz», - dedi ol depýtattar aldynda.
Depýtattar bul zańsyzdyq jaily kompaniia basshysynan indete eshteńe suraǵan joq. Alaida bul saýal kýlýarda ainalyp kelip Sanjar Jarkeshovke ekinshi ret qoiyldy. Tilshiler odan «gaz salasynda anyqtalǵan deldaldyq shemalar men zań buzýshylyqtar qai kezderde boldy jáne oǵan kim kináli?» dep suraǵan. Alaida QazaqGaz kompaniiasynyń basshysy Sanjar Jarkeshov bul suraqqa jaýap bere almady.
«Endi ony bálen dep aitý qiyn. Qanshama jylda gaz salasynda qanshama ózgeris boldy, ártúrli adamdar keldi. Solai qalyptasyp qalǵan. Qańtar oqiǵasynan keiin kóp nárse ashylyp jatyr ǵoi», - dedi ol májilis kýlýarynda jýrnalisterge.
Kompaniia basshysy osy taqyrypqa bailanysty budan keiingi suraqtarǵa naqty jaýap bermei, tergeý amaldaryna siltedi.
Aita ketsek, ótken jyldyń sońynda, Qazaqstan úkimetiniń sheshimimen «QazTransGaz» kompaniiasy «Samuryq-Qazyna» AQ quramyna kirip, «ulttyq kompaniia» mártebesine ie bolyp, portfeldik kompaniiasyna ainalǵan. Sondai-aq onyń ataýy «QazaqGaz» dep ózgergen. 2022 jyldyń 15 qańtaryna deiin ol kompaniiany Nursultan Nazarbaevtyń kúieýbalasy – Dariǵa Nazarbaevanyń kúieýi Qairat Sháripbaev basqarǵan.
