Qazaqstannyń depozitterge kepildik berý qory Qazaq Banki salymshylaryna agent bank - VTB Banki arqyly kepildik berilgen ótem tóleý merzimi 1 mamyryna deiin uzartylǵany jariialady, dep habarlaidy "Ult aqparat" qordyń baspasóz qyzmetine silteme jasap.
Qor Qazaq Banki aldyndaǵy mindettemeleriniń jalpy somasynyń 99 paiyzyn oryndady. 2021 jyldyń 16 sáýirine deiin qalyptasqan jaǵdai boiynsha atalmysh bank salymshylary agent bank arqyly 20,4 mlrd teńge kepildik berilgen ótemdi aldy. Ony alýǵa 6 myń adam nemese salymshylardyń 33 paiyzy ótinish bergen.
Qazir ótemdi almaǵan salymshylardyń shamamen 160 mln teńgesi qalǵan.
«Qazaq Banki» AQ salymshylary kepildik berilgen ótemdi alý jónindegi ótinishpen agent banktiń bólimshelerine júgine alady. Bul úshin www.vtb-bank.kz saity nemese 5050 nómiri boiynsha (uialy telefon arqyly tegin) anyqtama qyzmetinen filialdardyń jumys kestesi týraly aldyn ala bilýi kerek.
Eske salamyz, «Qazaq Banki» AQ depozitinde, aǵymdaǵy jáne karta shotynda aqshasy bar salymshylar (jeke tulǵalar men kásipkerler) kepildik berilgen ótemdi alýǵa ótinish beredi. Kepildik mólsheri:
- ulttyq valiýtadaǵy qarajat boiynsha – 10 mln teńgeden;
- shetel valiýtasyndaǵy qarajat boiynsha – 5 mln teńgeden aspaidy.
Salymshyda túri men valiýtasyna qarai birneshe depozit bolǵan jaǵdaida, kepildik berilgen jiyntyq ótem, árbir depozit túri boiynsha shekti mólsherdi eskere otyryp, 15 mln teńgeden aspaidy.
Barlyq tólemder tek teńgede júzege asyrylady. Shetel valiýtasyndaǵy salymdar boiynsha ótem bankti taratý týraly sot sheshimi zańdy kúshine engen kúni – 2018 jylǵy 12 jeltoqsanda belgilengen valiýta aiyrbastaý baǵamy boiynsha esepteledi.
