Qazaq Air búginnen bastap Reseige reisterdi toqtatty, - dep habarlaidy Tengrinews.kz tilshisi áýekompaniianyń saityna silteme jasap.
"Qazaq Air áýekompaniiasy saqtandyrý uiymynan Resei aýmaǵynda jáne onyń áýe keńistiginde saqtandyrý óteliminiń berilmegeni týraly habarlama aldy. Osy jaǵdaiǵa bailanysty kompaniia saqtandyrý boiynsha másele sheshilgenge deiin Resei aýmaǵynyń ústinen usha almaidy. Osyǵan bailanysty Novosibirge baratyn búgingi reis (2022 jylǵy 12 naýryz) toqtatyldy", - delingen resmi habarlamada.
Jolaýshylarǵa bilet quny tolyq qaitarylatyny aityldy.
"Biletterdi satyp alǵan jerden qaitarýǵa bolady. Bilet áýekompaniiadan satyp alynsa, info@flyqazaq.com elektron poshtasyna jazǵan jón. Qaitarýǵa ótinimmen birge bron nómirin jáne bailanys derekterin kórsetý kerek. Bilet agenttikten satyp alynsa, satyp alǵan jerge habarlasý qajet", - dep habarlady áýekompaniia ókilderi.
