12 shilde kúni Temirtaýda jańartylǵan Qarmet Park resmi túrde ashyldy. Aýmaǵy 4 gektardan asatyn saiabaqta infraqurylym tolyq jańǵyrtylyp, demalysqa, sportpen shuǵyldanýǵa jáne otbasylyq ýaqyt ótkizýge arnalǵan zamanaýi jaǵdailar jasaldy, dep habarlaidy ult.kz.
Saiabaq aýmaǵynda jańa serýendeý baǵyttary, abattandyrylǵan demalys aimaqtary, besedkalar, zamanaýi balalar jáne sport alańdary, sondai-aq ártúrli belsendilik túrlerine arnalǵan keńistikter paida boldy. Jaryqtandyrý júieleri men injenerlik jeliler jańartylyp, qoǵamdyq dárethanalar ornatyldy, sý aidyndary qalpyna keltirilip, kógaldandyrý jumystary júrgizildi.
Kelýshilerdiń ártúrli jas sanattary úshin jailylyq pen qoljetimdilikke erekshe nazar aýdaryldy. Saiabaqta sportpen ainalysýǵa, otbasylyq serýenge, mádeni is-sharalar men aýqymdy qalalyq merekelerdi ótkizýge arnalǵan alańdar qarastyrylǵan. Júrgizilgen jańǵyrtý jumystarynyń arqasynda Qarmet Park jańa tynys alyp, Temirtaýdyń basty qoǵamdyq keńistikteriniń birine qaita ainaldy.
Kúnniń basty oqiǵalarynyń biri – Qarmet Run 2026 jappai júgirý jarysy. Start aldynda qatysýshylar fitnes-klýb jattyqtyrýshylarymen birge jalpy qyzdyrý jattyǵýyn ótkizip, keiin start syzyǵyna ornalasty. Biyl 5 jáne 10 shaqyrymdyq qashyqtyqtarǵa Temirtaý, Qaraǵandy, Astana jáne Qazaqstannyń ózge qalalarynan kelgen myńnan astam áýesqoi qatysty.
Dástúr boiynsha jarysty alǵash bolyp erekshe qajettilikteri bar sportshylar bastady, olarǵa eriktiler súiemeldeý kórsetti. Arbadaǵy qatysýshylar qatarynda Janna Bakenova, Iýrii Kim jáne Nikolai Shenderov bar.
Qarmet kompaniiasynyń kúrdeli qurylys jónindegi direktory Aleksei Sidorenko bul bastamanyń jyldan jylǵa tanymal bola túsip jatqanyn atap ótti:
«Ekinshi jyl qatarynan jappai júgirýdi ótkizý bastamamyz keń qoldaý taýyp keledi. Qala turǵyndarynyń mundai sharalardy kútetini, adamdarǵa sporttyq is-sharalar men belsendi ári kóterińki kóńil-kúide ýaqyt ótkizý múmkindigi qajet ekeni baiqalady. Ótken jyly júgirý Metallýrgter kúni merekesi aiasynda ótse, biyl Qarmet Park-tyń ashylýymen ushtastyryldy. Aldaǵy jyly Qarmet Run derbes iri is-sharaǵa ainalýy ábden múmkin», – dedi ol.
Qatysýshylardy Temirtaý qalasy ákiminiń orynbasary Raýan Taran da quttyqtady.
«Búgin, Metallýrgter kúni qarsańynda, bul aýqymdy júgirýge myńnan astam adam qatysýda. Bul – bizdiń qala úshin úlken jetistik. Temirtaý árdaiym sporttyq dástúrleri qalyptasqan qala bolǵan, al búgin turǵyndardy biriktiretin jańa qoǵamdyq keńistikterdiń paida bolýy asa mańyzdy. Mundai jobalar “Zań men Tártip” ideologiiasy men “Taza Qazaqstan” bastamasyna sai kelip, belsendi ári salaýatty ómir saltyn qalyptastyrýǵa yqpal etedi», – dedi ol.
Qalalyq máslihat tóraǵasy Aleksei Lomakin de mundai is-sharalardyń sporttyq dástúrlerdiń damýyna jańa serpin beretinin atap ótti:
«Bul – qala úshin mańyzdy ári jarqyn shara. Ol Temirtaýda sporttyń damýyna jańa serpin beredi. Saiabaqty qaita jańǵyrtyp, jańa qalalyq dástúr qalyptastyrǵan kombinat basshylyǵyna úlken alǵys aitamyz. Bul jarys aldaǵy jyldary da jalǵasyn taba bersin», – dedi.
LPTs-3 tsehynyń elektr monteri Maksim Rem 5 shaqyrymdyq qashyqtyqta aǵa jas sanaty boiynsha erler arasynda ekinshi oryndy ielenip, jarystyń joǵary deńgeide uiymdastyrylǵanyn atap ótti:
«Óte jaqsy jarys boldy. Nátije úshin júgirdim, júldegerler qataryna endim. Uiymdastyrý deńgeii joǵary, marshrýt óte unady», – dedi sportshy.
10 shaqyrymdyq qashyqtyqta 39 jasqa deiingi sanat boiynsha jeńimpaz atanǵan Ákim Erkebai jarysqa arnaiy Astanadan kelgen:
«Qazir Astanada turyp, matematikadan sabaq beremin. Qaraǵandylyq dosym osy jarysqa shaqyrdy. Jol óte jaqsy, ainalasy kórkem tabiǵat. Qatysýdan úlken áser aldym», – dedi jarysqa qatysýshy.
Márege jetken árbir qatysýshyny kórermender qoshemetpen qarsy aldy. Jeńimpazdar men júldegerlerge kýboktar men gramotalar tabystalyp, barlyq qatysýshylarǵa estelik medaldar berildi.
Alaida Qarmet Run 2026-nyń basty nátijesi – sekýndtar men oryndar emes, úlken qalalyq merekeniń erekshe atmosferasy. Jarys ártúrli jastaǵy, mamandyqtaǵy jáne daiyndyq deńgeiindegi adamdardy sportqa, qozǵalysqa jáne belsendi ómir saltyna degen umtylys tóńireginde biriktirdi.
