Qaraǵandy oblysynda tabiǵi órtpen kúres kúsheitildi. Qarqaraly men Aqtoǵai aýdandarynda qurǵaq shóp pen orman alqaptaryn jalyn sharpyǵan. Órt eldi mekenderge qaýip tóndirmegenimen, ony sóndirý jumystary kúrdeli jaǵdaida júrgizilip jatyr, dep habarlaidy ult.kz.
Qarqaraly aýdanyndaǵy Jańatoǵan aýylynyń mańynda qurǵaq shóp órtengen. Órtti aýyzdyqtaýǵa qatty jel men taýly jer bederi kedergi keltirip otyr. Sonyń saldarynan jekelegen órt oshaqtaryna jetý qiyndap, jalynnyń taralý qaýpi arta túsken.
Qazir aýyldy qorǵaý jáne órttiń eldi mekenge qarai jyljýyna jol bermeý úshin Tótenshe jaǵdailar ministrligi men jergilikti atqarýshy organdardyń kúshteri jumyldyryldy. Órt ornyna TJD-nyń qosymsha kúshteri men tehnikasy jiberilip, jaǵdaidy baqylaýda ustaý úshin jedel shtab quryldy.
Al Aqtoǵai aýdanynda tabiǵi órt budan da aýqymdy aýmaqty sharpyǵan. Kejek aýyldyq okrýginde, Aqshi aýylynan ońtústik-batysqa qarai shamamen 40 shaqyrym jerdegi taýly aimaqta jáne Aqtoǵai ormandar men janýarlar dúniesin qorǵaý sharýashylyǵynyń aýmaǵynda órt shyqqan.
Aldyn ala málimet boiynsha, jalyn 1090 gektar aýmaqqa taraǵan. Onyń shamamen 1000 gektary memlekettik orman qorynyń jeri.
Órtti sóndirýge TJD, jergilikti ákimdik pen orman sharýashylyǵy mekemeleriniń qyzmetkerleri tartylǵan. Barlyǵy 140 adam men 24 tehnika jumys istep jatyr. Onyń ishinde TJD-dan 42 adam men 7 tehnika, jergilikti atqarýshy organdardan 78 adam men 13 tehnika, orman sharýashylyǵy mekemelerinen 20 adam men 4 tehnika jumyldyrylǵan.
Quzyrly organdardyń málimetinshe, eki aýmaqta da eldi mekenderge tikelei qaýip joq. Degenmen jeldiń kúsheiýi men kúrdeli jer bederi órtti tolyq aýyzdyqtaýdy qiyndatyp otyr.
Qazir mamandar órtti oqshaýlaý jáne tolyq sóndirý jumystaryn táýlik boiy júrgizýde. Jaǵdai Qaraǵandy oblysy Tótenshe jaǵdailar departamentiniń turaqty baqylaýynda.
