Temirtaý qalasynyń mańynda politseiler úi jaǵdaiynda uiymdastyrylǵan esirtki plantatsiiasyn anyqtap, 125 túp qarasora tárkiledi, dep habarlaidy ult.kz.
Polisia.kz málimetinshe, zańsyz jylyjai Qaraǵandy oblysynda ótkizilip jatqan «Qarasora – 2026» respýblikalyq jedel-profilaktikalyq is-sharasy aiasynda áshkerelendi. Jedel is-shara barysynda Temirtaýǵa jaqyn ornalasqan eldi mekenderdiń birindegi kókónis ósirýge arnalǵan jylyjaidyń esirtki quramdy ósimdikterdi ósirýge beiimdelgeni anyqtalǵan.
Temirtaý qalalyq politsiia basqarmasynyń esirtki qylmysyna qarsy is-qimyl bóliminiń qyzmetkerleri men Qaraǵandy jáne Ulytaý oblystary boiynsha Qylmystyq-atqarý júiesi departamentiniń qyzmetkerleri júrgizgen birlesken operatsiia barysynda 19 jastaǵy jergilikti turǵyn ustaldy.
– Jeke turǵyn úidiń aýmaǵyn tekserý kezinde úi irgesindegi jer teliminen jáne arnaiy jabdyqtalǵan jylyjaidan qarasora tektes 125 túp esirtki quramdy ósimdik tabyldy. Sondai-aq tintý barysynda sharýashylyq qurylystarynyń birinen keptirilgen ósimdik tektes esirtki zattary men tirkelmegen ańshylyq myltyq tárkilendi. Aldyn ala málimet boiynsha, kúdikti qarasorany arnaiy jasalǵan jaǵdailarda ózi ósirgen, – dedi Qaraǵandy oblysy politsiia departamenti bastyǵynyń birinshi orynbasary Qýanysh Orynbetov.
Atalǵan derek boiynsha Qazaqstan Respýblikasy Qylmystyq kodeksiniń 300-babynyń 1-bóligi («Quramynda esirtki zattary bar, ósirýge tyiym salynǵan ósimdikterdi zańsyz ósirý») boiynsha sotqa deiingi tergep-tekserý bastaldy.
Politsiia esirtki quramdy ósimdikterdi zańsyz ósirý qylmystyq jaýapkershilikke ákeletinin eskertip, «Zań jáne tártip» qaǵidaty aiasynda esirtkiniń zańsyz ainalymyna qarsy kúres jalǵasatynyn málimdedi. «Qarasora – 2026» jedel-profilaktikalyq is-sharasy erekshe baqylaýda, al esirtki qylmystarymen kúres ishki ister organdary jumysynyń basym baǵyttarynyń biri bolyp qala beredi.
