Shymkentte Qairat Nurtastyń kontsertinde adamdar arasynda qysylyp qalǵan 18 jastaǵy qyz jansaqtaý bólimine jetkizildi. Dárigerler onyń jaǵdaiyn aýyr dep baǵalaǵan, dep habarlaidy ult.kz.

Oqiǵa 10 qazanda Qajymuqan Muńaitpasov atyndaǵy stadionda ótken «Sahnada 20 jyl» kontsertinde bolǵan. Aldyn ala málimetke súiensek, kórermender shamadan tys shoǵyrlanyp, boijetken kópshilik arasynda qysylyp, jaraqat alǵan.

Zardap shekken qyzdyń týysy áleýmettik jelide jazba jariialap, jurttan qoldaý suraǵan. Onyń aitýynsha, boijetken adamdardyń aiaǵynyń astynda qalǵan.

"Adamdy qulatyp, ólim aýzyna jetkenshe taptaityndai qalai sonsha qatygez bolýǵa bolady? Meniń baýyrymdy ne úshin uryp, taptadyńyzdar? Ol alty saǵattan beri jansaqtaý bóliminde, ómir men ólimniń arasynda jatyr. Qazir bizge óte aýyr. Ótinemin, aman qalsyn dep duǵa etińizdershi", – dep jazǵan týysy.

Shymkent qalalyq densaýlyq saqtaý basqarmasy boijetkenniń jaǵdaiyna qatysty túsinikteme bergen. Basqarmanyń 11 qazan tańerteńgi málimeti boiynsha, naýqastyń jaǵdaiy turaqty aýyr bolǵanymen, azdaǵan jaqsarý baiqalǵan.

"Oǵan qajetti meditsinalyq kómek kórsetilip jatyr. Naýqas mamandardyń baqylaýynda", – dep habarlaǵan basqarma.

Aita keteiik, Baǵdagúl emshi Qairat Nurtastyń kontsertin synady.

Ne jaǵdai boldy?

10 qazanda Shymkenttegi Qajymuqan Muńaitpasov atyndaǵy stadionda Qairat Nurtastyń shyǵarmashylyǵyna 20 jyl tolýyna arnalǵan kontsert ótti. Alaida stadionǵa kireberiste kórermender arasynda keptelis týyndap, adamdar bir-birin qysa bastaǵan.

Politsiianyń aldyn ala málimetinshe, kontsertke alańnyń syiymdylyǵynan artyq bilet satylǵan. Oqiǵadan keiin qaýipsizdik talaptarynyń buzylýyna bailanysty qylmystyq is qozǵaldy. Kontsertti uiymdastyrǵan 1984 jyly týǵan azamat ustalyp, ýaqytsha ustaý izoliatoryna qamaldy.