شىمكەنتتە قايرات نۇرتاستىڭ كونتسەرتٸندە ادامدار اراسىندا قىسىلىپ قالعان 18 جاستاعى قىز جانساقتاۋ بٶلٸمٸنە جەتكٸزٸلدٸ. دەرٸگەرلەر ونىڭ جاعدايىن اۋىر دەپ باعالاعان, دەپ حابارلايدى ult.kz.

وقيعا 10 قازاندا قاجىمۇقان مۇڭايتپاسوۆ اتىنداعى ستاديوندا ٶتكەن «ساحنادا 20 جىل» كونتسەرتٸندە بولعان. الدىن الا مەلٸمەتكە سٷيەنسەك, كٶرەرمەندەر شامادان تىس شوعىرلانىپ, بويجەتكەن كٶپشٸلٸك اراسىندا قىسىلىپ, جاراقات العان.

زارداپ شەككەن قىزدىڭ تۋىسى ەلەۋمەتتٸك جەلٸدە جازبا جارييالاپ, جۇرتتان قولداۋ سۇراعان. ونىڭ ايتۋىنشا, بويجەتكەن ادامداردىڭ اياعىنىڭ استىندا قالعان.

"ادامدى قۇلاتىپ, ٶلٸم اۋزىنا جەتكەنشە تاپتايتىنداي قالاي سونشا قاتىگەز بولۋعا بولادى? مەنٸڭ باۋىرىمدى نە ٷشٸن ۇرىپ, تاپتادىڭىزدار? ول التى ساعاتتان بەرٸ جانساقتاۋ بٶلٸمٸندە, ٶمٸر مەن ٶلٸمنٸڭ اراسىندا جاتىر. قازٸر بٸزگە ٶتە اۋىر. ٶتٸنەمٸن, امان قالسىن دەپ دۇعا ەتٸڭٸزدەرشٸ", – دەپ جازعان تۋىسى.

شىمكەنت قالالىق دەنساۋلىق ساقتاۋ باسقارماسى بويجەتكەننٸڭ جاعدايىنا قاتىستى تٷسٸنٸكتەمە بەرگەن. باسقارمانىڭ 11 قازان تاڭەرتەڭگٸ مەلٸمەتٸ بويىنشا, ناۋقاستىڭ جاعدايى تۇراقتى اۋىر بولعانىمەن, ازداعان جاقسارۋ بايقالعان.

"وعان قاجەتتٸ مەديتسينالىق كٶمەك كٶرسەتٸلٸپ جاتىر. ناۋقاس مامانداردىڭ باقىلاۋىندا", – دەپ حابارلاعان باسقارما.

ايتا كەتەيٸك, باعداگٷل ەمشٸ قايرات نۇرتاستىڭ كونتسەرتٸن سىنادى.

نە جاعداي بولدى?

10 قازاندا شىمكەنتتەگٸ قاجىمۇقان مۇڭايتپاسوۆ اتىنداعى ستاديوندا قايرات نۇرتاستىڭ شىعارماشىلىعىنا 20 جىل تولۋىنا ارنالعان كونتسەرت ٶتتٸ. الايدا ستاديونعا كٸرەبەرٸستە كٶرەرمەندەر اراسىندا كەپتەلٸس تۋىنداپ, ادامدار بٸر-بٸرٸن قىسا باستاعان.

پوليتسييانىڭ الدىن الا مەلٸمەتٸنشە, كونتسەرتكە الاڭنىڭ سىيىمدىلىعىنان ارتىق بيلەت ساتىلعان. وقيعادان كەيٸن قاۋٸپسٸزدٸك تالاپتارىنىڭ بۇزىلۋىنا بايلانىستى قىلمىستىق ٸس قوزعالدى. كونتسەرتتٸ ۇيىمداستىرعان 1984 جىلى تۋعان ازامات ۇستالىپ, ۋاقىتشا ۇستاۋ يزولياتورىنا قامالدى.