Qazaqstandyqtar Iýliia Pýtintseva men Zarina Diias Nur-Sultanda 25 qyrkúiek – 2 qazan aralyǵynda elimizde alǵash ret ótetin Astana Open WTA 250 týrnirine qatysady, dep habarlaidy "Ult aqparat".
Qazaqstan tennis federatsiiasy málim etkenindei, álemniń 33-raketkasy Pýtintseva men reitingte 110-orynda turǵan Diias osylaisha Ulttyq tennis ortalyǵynyń korttarynda óner kórsetpekshi.
Qatysýshylar qatarynda álemniń 52-raketkasy, reseilik Liýdmila Samsonova, buryn juptyq synda dúniejúzilik reitingte kósh bastaǵan, «Úlken dýlyǵa» týrnirleriniń bes dúrkin jeńimpazy, frantsiialyq Kristina Mladenovich, jekelei synda eki márte «Úlken dýlyǵa» dodasynyń finalisi atanǵan reseilik Vera Zvonareva bar.
Halyqaralyq týrnirde sondai-aq shvetsiialyq Rebekka Peterson, chehiialyq Tereza Martintsova, belgiialyq Elison Van Eitvank, rýmyniialyq Irina-Kameliia Begý, sloveniialyq Polona Hertsog, horvatiialyq Ana Koniýh jáne basqa tennisshiler baq synaidy.
Taǵy tórt sportshy negizgi týrnirge irikteý saiystary arqyly ótedi. Qalǵan tórteýi uiymdastyrýshylardan arnaiy shaqyrtý alady.
Jarystyń júlde qory 235 myń AQSh dollaryn quramaq.
Jekelei synda chempion atanǵan oiynshy 29 200, finalist 16 398 dollarǵa ie bolmaq. Tipti alǵashqy ainalymda jeńilis tapqandardyń ózi qur ketpei, 3 325 dollar almaq.
Juptyq synnyń jeńimpazdary 10 300, finalister 6 myń AQSh dollaryn bólip alady. Birinshi ainalymnan asa almaǵandar 1 750 dollardy bóledi.
