Resei Prezidenti Vladimir Pýtinniń kishi qyzy Katerina Tihonova qurǵan "Ulttyq ziiatkerlik damý" qory 2018 jyly 488 million rýbl tabys tapqan. Qor buryn-sońdy osynshalyqty kólemde tabys taýyp kórmegen. "Otkrytye media" basylymynyń qorǵa qatysty zertteýinde osyndai derek aitylady.
Tihonova qory jas ǵalymdarǵa qoldaý kórsetip, biznes salasynda ǵylymi zertteýler júrgizýmen ainalysady. Buǵan qosa, Máskeý memlekettik ýniversiteti mańyndaǵy aýmaqta qurylys nysandaryn salýy múmkin. Basylymnyń jazýynsha, "Rosneft" kompaniiasy oǵan iri kólemde tapsyrys beredi. Quramynda "Ulttyq ziiatkerlik damý" qory bar "Innopraktika" uiymyna memlekettik munai kompaniiasynan 659 million rýbl kóleminde tapsyrys túsken.
"Otkrytye media" basylymynyń jazýynsha, 2019 jyly tapsyrys berýshiniń "belsendiligi" azaiyp, "Innopraktika" iri tapsyrystardan qaǵyla jazdaǵan. Biraq jyl sońyna qarai "Rosatom" ony "qutqaryp qalyp", ǵylymi jumystarǵa tapsyrys bergen. Oǵan qaraityn "Atomenergoprom" qazan jáne qarasha ailarynda quny 120 million rýbl bolatyn eki jobaǵa tapsyrys bergen. Jaqynda qor zertteý júrgizý maqsatynda quny 65 million rýbl bolatyn kelisim-shartqa qol qoiǵan. Eki rette de Tihonova qory baiqaýǵa jalǵyz ózi qatysqan.
Máskeý memlekettik ýniversiteti prorektorynyń orynbasary Katerina Tihonova mamyr aiynda dissertatsiiasyn qorǵaǵan. 2015 jyly qarasha aiynda Reuters agenttigi onyń prezident Vladimir Pýtinniń qyzy ekenin habarlady. Osydan keiin halyqaralyq BAQ bul tezisti dáleldeitin birqatar zertteýler jariialady. AQSh-tyń qarjy ministrligi ony Pýtinniń qyzy dep ataidy. Kreml men Pýtin buǵan qatysty túsinikteme bermedi. Kreml aqparatty rastamady ne joqqa shyǵarmady.
