Fox News arnasynyń júrgizýshisi Bill O'Reili RF prezidenti Vladimir Pýtindi "qanysher" dep ataǵany úshin keshirim suramaitynyn málimdedi, - dep habarlaidy RIA Novosti.
Resei basshysynyń baspasóz hatshysy Dmitrii Peskov prezidentke qarata aitylǵan mundai sózderdi til tigizý dep sanaitynyn málimdep, mundaiǵa jol berýge bolmaidy dep esepteidi. Sonymen qatar, ol jýrnalistiń keshirim suraýyn kútetinin jetkizgen bolatyn. Reseidiń jýrnalister odaǵy da eshbir jýrnalistiń bireýdi qanysher dep aiyptaýǵa quqy joǵyn aitqan.
Al jýrnalistiń ózi keshirim suraýǵa nietti emes ekenin tikelei efirde aitty. "Men qalai keshirim suraitynymdy oilastyryp júrmin, bul biraz ýaqyt alýy múmkin. Bir 2033 jyldary daiyn bolyp qalady", - dedi O'Reili.
Munyń aldynda AQSh prezidenti Donald Tramppen tildese otyryp, O'Reili Batys elderiniń resmi Máskeýge qatysty aiyptardy eske salyp, Resei basshysyn "qanysher" dep ataǵan. Bul sózge Tramp "Siz qalai oilaisyz? Bizdiń el sonshalyqty pák pe edi?", - dep jaýap berip, Amerika Reseige qarsy turǵansha, seriktes bolǵany utymdy bolatynyn aitty.
