Resei Federatsiiasynyń prezidenti Vladimir Pýtin el sportshylarynyń 2018 jylǵy qysqy Olimpiada oiyndaryna beitarap túrde qatysýǵa ruqsat berdi, dep jazady TASS.
Vladimir Pýtin Gorkovsk avtozaýytynda jumysshylarmen kezdesýi kezinde resei sportshylarynyń Koreiada ótetin 2018 jylǵy qysqy Olimpiada oiyndaryna beitarap túrde qatysýyna kedergi keltirmeitindigin aitty.
«Sportshylarymyzǵa Olimpiadaǵa qatysýǵa kedergi bolmaimyz. Olar búkil ómirin osy oiyndarǵa daiyndyqpen ótkizip keledi, bul olar úshin óte mańyzdy. Sondyqtan, eshkimge tyiym salmaimyz», - dedi Pýtin.
Eske sala keteiik, Resei quramasy 2018 jyly Ońtústik Koreianyń Phenchhan qalasynda ótetin HHIII qysqy Olimpiada oiyndaryna óz elderiniń atynan qatysa almaidy. Bul sheshimdi halyqaralyq Olimpiada komiteti Lozannada (Shveitsariia) ótken arnaiy otyrysta qabyldaǵan bolatyn.
Phenchhandaǵy qysqy Olimpiada oiyndary 9-28 aqpan aralyǵynda ótedi.
