Resei prezidenti Vladimir Pýtin men burynǵy ákimshilik jetekshisi Sergei Ivanov (oń jaqta).
Kremldegi kútpegen kadrlik aýys-túiis kezinde Resei prezidenti óziniń saiasi serigi, ákishilik jetekshisi Sergei Ivanovty qyzmetinen bosatyp, eleýsiz orynǵa aýystyrdy.
Tamyzdyń 12-si kúni Kremldiń baspasóz qyzmeti prezident Vladimir Pýtinniń jarlyǵyn jariialap, ákimshilik jetekshisi Sergei Ivanovtyń qyzmetinen bosatylǵanyn habarlady. Burynǵy KGB ofitseri Sergei Ivanov buryn Pýtinniń qol astynda qorǵanys ministri jáne vitse-premer bolyp qyzmet atqarǵan edi.
Pýtinniń sózinshe, Ivanov ákimshilik basshysy bolyp tym uzaq otyryp qalǵasyn qyzmetten ketý týraly ózi ótinish bergen. 2011 jylǵy jeltoqsannan beri Kreml ákimshiligin basqaryp kelgen Ivanov Qaýipsizdik keńesindegi músheligin de tapsyryp berdi.
Kóp uzamai Reseidiń memlekettik telearnalary prezident Pýtinniń Kreml ákimshiliginiń jańa basshysy Anton Vainomen kezdesip otyrǵanyn kórsetti.
Bul kadrlik aýys-túiis Resei ekonomikalyq daǵdarysty bastan keship jatqan tusta, parlament sailaýyna bir-aq ai qalǵan kezde jasaldy. Buǵan deiin shildede aimaq gýbernatorlarynyń birazy jańadan taǵaiyndalǵan edi.
2008 jyly Resei prezidenti úshinshi merzimge sailana almaityn bolǵanda Ivanov onyń murageri retinde atala bastaǵan. Biraq Pýtin Dmitrii Medvedevti tańdap alǵan.
Tamyzdyń 12-si kúni Pýtin keshe ǵana Reseidegi eń yqpaldy sheneýnikterdiń biri sanalǵan Ivanovty kólik jáne qorshaǵan ortany qorǵaý salasy boiynsha arnaiy ýákil degen eleýsiz qyzmetke taǵaiyndady.
Anton Vaino, Resei prezidenti ákimshiliginiń jetekshisi
Telearnalar kórsetken videoda Ivanov Pýtinge "17 jyl boiy jasaǵan qyzmetine joǵary baǵa bergeni úshin" alǵys aitady. 2001 - 2007 jyldar arasynda qorǵanys ministri bolǵan Ivanov Pýtin 2012 jyly úshinshi prezident merzimin bastaǵan tusta ákimshilik jetekshisi bolyp taǵaiyndalǵan edi.
Ivanov - Pýtinniń mańynan qýylǵan saiasi serikterdiń alǵashqysy emes. Buǵan deiin Resei temir joldarynyń basshysy Vladimir Iakýnin, esirtki saýdasymen kúres salasyn basqarǵan Viktor Ivanov qaýipsizdik qyzmetiniń basshysy Evgenii Mýrov ta shetke ysyrylǵan.
Biraq Sergei Ivanovtyń qyzmetinen túsýi máskeýlikterdi tań qaldyrdy.
Saiasattanýshy Mihail Troitskii dpa aqparat agenttigine "Ivanovtyń densaýlyǵy nasharlaǵan siiaqty, Pýtin "eski gvardiiany" ózinen alystatyp, jas mamandardy tartyp jatyr" dep pikir aitqan.
Ivanovtyń ornyna kelgen Vaino Reseidegi kópshilikke belgisiz tulǵa.
Saiasi sarapshy Valerii Solovei Azattyqtyń Orys qyzmetine bergen suhbatynda Vainony "Pýtinniń súiikti kadry" dep sipattaidy.
"Pýtin Vainoǵa qatty senedi. Ol óte senimdi buiryq oryndaýshy ári menedjer retinde tanylǵan" deidi Solovei.
Tamyzdyń 12-si kúni áleýmettik jelide jariialanǵan eski fotolardyń birinde Vaino Kremlde ótken bir sharada Pýtindi jańbyrdan qorǵap qolshatyr ustap tur.
44 jastaǵy Vaino aǵylshyn jáne japon tilderinde erkin sóileidi dep sipattalady. Ol Reseidiń Japoniiadaǵy elshiliginde qyzmet istegen. 2012 jyldan beri prezident ákimshiligi jetekshisiniń orynbasary bolyp kelgen. Vainonyń atasy Karl Vaino 1978 - 1988 jyldary Estoniia Kommýnistik partiiasyn basqarǵan.
Keibir sarapshylar Kremldegi bul aýys-túiistiń qyrkúiekte bolatyn parlament sailaýyna qatysy bar dep oilaidy. Reseidegi kelesi prezident sailaýy 2018 jyly ótedi. Kópshilik Pýtin tórtinshi márte sailaýǵa túsedi dep sanaidy.
