Resei prezidenti Vladimir Pýtin Nobel syilyǵynyń laýreaty Dmitrii Mýratovtyń "shetel agentteri" tizimine enýi múmkin ekeni jaily aqparatqa pikirin aitty.
Prezidenttiń pikirinshe, "Novaia gazeta" basylymynyń bas redaktory "syilyqty qalqan qylyp jasyrynbaýy tiis", eger zań buzsa, ol ony qutqara almaidy dedi.
Mýratov jaily suraq Pýtinge 13 qazanda Máskeýde ótken "Resei energetika aptalyǵynyń" plenarlyq sessiiasynda qoiylǵan. Buǵan deiin Resei zańy boiynsha qarjylai syiaqy alǵan jýrnalist shetel agenti retinde jariialanýy múmkin ekeni aitylǵan. Mýratovtyń pikirinshe, bilik ony jáne "Novaia gazetany" tizimge qosatyndai sonshalyqty aqymaq emes.
Mýratov – postsovettik Reseide Nobel syilyǵyna ie bolǵan alǵashqy laýreat. Onyń syilyqty iemdengeni 8 qazanda belgili boldy. Onymen birge syilyq filippindik zertteýshi jýrnalist Mariia Ressaǵa da berildi.
Pýtin alǵash ret syilyqqa bailanysty pikirin aityp tur. Ol syilyqqa ie bolyp otyrǵan Reseidiń tórtinshi azamatyn quttyqtaǵan joq. Kreml atynan Mýratovty prezident baspasóz hatshysy Dmitrii Peskov quttyqtaǵan.
Pýtin sársenbi kúngi sessiia kezinde Resei oppozitsiiasy jóninde de pikirin aitqan.
"Tutas alǵanda bizde oppozitsiia bar, belsendi, bilikti synaidy, synaǵanda qatań synaidy, múmkin basqa elderde ondai joq bolar. Keibir reseilik aqparat quraldaryn qosyńyzshy, bári anyq bola qalady. Olar jumys istep jatyr, eshkim olarǵa tiisip jatqan joq, bári durys. Odan bólek, "Gazpromnan" aqsha alady. "Gazprom" Eýropaǵa gaz satady da, oppozitsiialyq BAQ-ty qarjylandyrady" dedi ol. Pýtin bul tusta "Gazprom-media" holdingine qaraityn radiostantsiiany meńzep otyr.
Quqyq qorǵaýshylar saiasi tutqyn dep tanyǵan Navalnyi isine toqtalǵan Pýtin onyń qylmysy úshin túrmege qamalǵanyn aitty. Ádettegidei ol Navalnyidyń aty-jónin aitpady.
