21 qyrkúiekte Resei prezidenti Vladimir Pýtin elde ishinara mobilizatsiia jariialaǵan soń Máskeýden Resei azamattary vizasyz kire alatyn elderge ushaq biletteri lezde satylyp ketti, dep habarlaidy Azattyq.
"Verstka" men "Medýza" saittarynyń jazýynsha, qazir Máskeýde 21 qyrkúiekke Stambýl, Erevan, Minsk, Baký, Tashkentke ushatyn ushaqtarǵa bilet joq.
Al "Aeroflot" saitynda Máskeýden Minskige 22 qyrkúiekte ushatyn reistiń bileti – ekonom klass 43106 rýbl (310 myń teńge), biznes klass 106631 rýbl (767 myń teńge) bolyp tur.
Belarýs pen Resei arasyndaǵy kelisimge sai, eki eldiń azamattary ishki tólqujatpen kire beredi, shekarada tekseris joq. Qujatty reis oryndaityn kompaniialardyń (avtobýs, poiyz, ushaq) qyzmetkerleri ǵana tekseredi.
Qazir "Belavia" kompaniiasynyń Máskeýden Minskige 21 qyrkúiekke reisin múldem alyp tastaǵan. Bul áýe kompaniiasynyń Minskiden Erevan, Stambýl, Almaty, Tbilisi, Batými, Kýtaisige de 21 qyrkúiektegi reisteri ushpaidy.
Búginge, 21 qyrkúiekke Reseiden Belarýske avtobýs pen poiyz ǵana bar.
21 qyrkúiekte Pýtin elde ishinara mobilizatsiia jariialap, áskerge zapastaǵy áskeriler, qarýly kúshter qatarynda buryn qyzmet etkender, tájiribesi bar áskeri mamandar shaqyrylatynyn aitty. Al Resei qorǵanys ministri Sergei Shoigý áskerge 300 myń adamdy shaqyrý josparda baryn málimdedi.
Kremldiń bul sheshiminen soń Habarovsk, Iakýtsk, Irkýtsk, Ýlan-Ýde, Tomsk qalalarynda jurt mobilizatsiiaǵa qarsy narazylyqqa shyqty.
Máskeý prokýratýrasy narazylyqqa shyqqandar "15 jylǵa deiin sottalýy múmkin" dep eskertý jasady.
