Máskeý men Ankara Siriia soltústigindegi Idlib proviniiasynda 6 naýryzdan bastap atysty toqtatýǵa kelisti. 5 naýryzda Túrkiia prezidenti Rejep Erdoǵan men Resei prezidenti Vladimir Pýtin Kremlde kezdeskennen keiin osyndai sheshim qabyldandy.
Budan bólek, taraptar Siriia soltústigindegi Haseke - Aleppo trassasy boiynda 12 shaqyrymǵa sozylatyn qaýipsizdik dálizin jasamaqshy. 15 naýryzdan bastap Resei men Túrkiia osy aimaqty birigip kúzete bastaidy.
Kelisimde sonymen birge Siriiadaǵy qaqtyǵysty áskeri amaldarmen sheshýge bolmaityny atap kórsetilgen.
Siriia prezidenti Bashar Asad áskeri qarýly oppozitsiiaǵa shabýyl jasap, Idlibtegi jaǵdai ýshyqqan kezde Pýtin men Erdoǵan kelissóz jasap otyr. Resei - Asadty, Túrkiia oppozitsiialyq toptardy qoldaǵandyqtan taraptardyń qaqtyǵysyp qalýy ábden múmkin edi.
Pýtinniń sózine qaraǵanda Siriiada jyl basynan beri radikaldar beibit turǵyndar men reseilik "Hmeimim" áskeri bazasyna shabýyl jasap keledi. Resei prezidenti Máskeý men Ankara Siriiadaǵy jaǵdaidy birge talqylap, turaqty túrde bailanys ornatyp otyr.
"Siriiadaǵy bolyp jatqan oqiǵaǵa bailanysty túrik áriptesterimizben pikirimiz bir jerden shyqpaýy múmkin. Biraq kúrdeli sátterde ortaq núkteni taýyp júrmiz. Bul joly da osylai boldy" dedi Pýtin.
Al Erdoǵan taraptar aimaqqa bosqyndardy qaitarý máselesimen ainalysady dep aitty. Ol sonymen birge eger Siriianyń úkimet kúshteri shabýyl jasasa, Ankaranyń qarymta qaitarý máselesin óz betinshe sheshýge quqyǵy bar ekenin aitty.
Kelissóz bastalmai turyp Pýtin Idlibtegi oqiǵa qaitalanbas úshin jáne Resei-Túrkiia qatynasy buzylmaityndai jaǵdai jasaý kerek. Ol sonymen birge Siriiada túrik áskerileriniń qazasyna bailanysty Erdoǵanǵa kóńil aityp, Siriia áskeriniń olarǵa qasaqana túrde soqqy bermegenin jetkizdi.
Túrkiia prezidenti Pýtinmen kelissóz qorytyndysy "Idlibtegi jaǵdaidy jeńildetetin shyǵar" degen úmiti baryn aitty.
Sońǵy birneshe aptada Idlibte ondaǵan túrik sarbazy qaza bolǵan. Kelissóz aldynda taraptar bir-birine kinálap, ótkir málimdeme jasaǵan. Alaida Túrkiia Asad áskerine dem berip otyrǵan Reseidi túrik sarbazdarynyń qazasyna tikelei kinálaǵan joq.
