Resei prezidenti Vladimir Pýtin LGBT-ny nasihattaýǵa tyiym salatyn zańǵa qol qoidy, dep habarlaidy Azattyq.
Jańa zań gomoseksýalizm, biseksýalizm jáne transgender týraly aqparat taratýdyń jolyn kesedi. Mundai zań Reseide 2013 jyldan bar, biraq ol kámeletke tolmaǵandarǵa ǵana arnalǵan bolatyn.
LGBT-ny BAQ-ta, internette, jarnamalarda, kórkem týyndylarda nasihattaǵandarǵa jańa zań boiynsha iri kólemde aiyppul salynady, sondai-aq olar ákimshilik jaýapqa tartylady.
Zań jobasyn 27 qazanda Resei memlekettik dýmasy birinshi oqylymda maquldaǵan. Talqylaý kezinde Resei depýtattary ákimshilik jaýapqa tartýmen shektelmei, qylmystyq jaýapkershilikke de tartýdy usynǵan, biraq onysy ótpegen.
Zań jobasy jasalyp jatqanda-aq zańgerler "úgit-nasihattyń" belgileri naqty kórsetilmegenin, LGBT-ny beitarap túrde ataǵannyń ózi "úgit-nasihat" dep baǵalanýy múmkin ekenin aitqan.
