Resei Prezidenti Vladimir Pýtin Qazaqstannyń jańa Memleket basshysy Reseimen qarym-qatynasty damytýdy jalǵastyra beredi dep sanaidy. Máskeý Resei-Qazaqstan jobalary iske asady degen úmitte.
"Iri jobalarymyz bar. Aldaǵy josparymyzdyń bári oryndalady dep senemiz. Qandai da bir kedergi bolady degenge eshqandai negiz joq", - dep Pýtin "Mir" telearnasyna bergen suqbatynda málimdedi, dep jazady Sputnik agenttigi.
Pýtin eske sala ótkendei, Qasym-Jomart Toqaev Máskeýde oqyǵan, Reseidi jaqsy biledi.
"Bul adam Qazaqstannyń Tuńǵysh Prezidenti Nursultan Ábishuly Nazarbaevtyń alǵan baǵytyn jalǵastyryp, Reseimen ári qarai jaqyndasyp, barlyq salalar boiynsha odaqtastyǵyn keńeite túsedi dep oilaimyn: óndiriste de, aýyl sharýashylyǵynda da, ǵarysh siiaqty ǵylymi salalarda da", - dedi Reseidiń memleket basshysy.
Pýtinniń aitýynsha, Resei men Qazaqstannyń gýmanitarlyq turǵyda yntymaqtastyǵy da úlken mańyzǵa ie.
"Elder arasyndaǵy taýar ainalymyn ósirý, bailanysty ártaraptandyrý, yntymaqtastyq múmkindikterin arttyrýmen qatar qos halyqtyń adami qarym-qatynasy da jaqsara túsedi. Adamdar arasynda milliondaǵan bailanys bar", - dedi Pýtin.
Budan buryn Qasym-Jomart Toqaev Aqordadaǵy baspasóz máslihatynda aitqandai, Qazaqstan Reseimen yntymaqtastyǵyn jalǵastyra beredi. Onyń aitýynsha, Máskeýge resmi sapary barysynda Vladimir Pýtinmen eki eldiń qarym-qatynasyn ári qarai damytý týraly sóilesken.
Aita ketsek, Qasym-Jomart Toqaev sailaýshylardyń 70,96% qoldaýymen Qazaqstan Prezidenti boldy. Sailanǵan memleket basshysyn ulyqtaý 12 maýsymda ótti.
