26 sáýirde Máskeýde Resei prezidenti Vladimir Pýtin BUU bas hatshysy Antoniý Gýterrishpen kezdesti. Shamamen bir saǵatqa sozylǵan kelissózdiń basty taqyryby Ýkrainadaǵy jaǵdai boldy, dep habarlaidy Azattyq.
Kezdesý kezinde Vladimir Pýtin Resei Ýkrainamen kelisýge beiil ekenin jáne jaǵdaidy diplomatiialyq turǵyda retteýden bas tartpaitynyn jetkizdi. Ol Stambýldaǵy kelissózdiń sátti ótkenin atap ótti.
"Eleýli ilgerileýshilikke qol jetkizdik. Ýkrainalyq áriptesterimiz qaýipsizdikke kepildikti Ýkrainanyń halyqaralyq dárejede moiyndalǵan shekarasy degen uǵymmen bailanystyrǵan joq" dedi Pýtin.
Stambýldaǵy kelissózden keiin Máskeýdiń "arandatýǵa" ushyraǵanyn aitqan Resei prezidenti budan soń júzdegen adam qyrylǵan Ýkrainanyń Býcha qalasyndaǵy qyrǵyn týraly da sóz qozǵaǵan.
Pýtinniń aitýynsha, dál osy jaǵdai eki el arasyndaǵy kelissózderge "bóget" bolǵan. Resei basshysynyń sózinshe, Ýkraina áýeli Donbass pen Qyrym máselelerin erekshe bólmei-aq talqylaýǵa daiyn bolǵan, biraq Býchadaǵy jaǵdaidan keiin olardy talqylaýdan múlde bas tartqan.
BUU bas hatshysy Antoniý Gýterrish Túrkiianyń eki el basshylarynyń kelissózin uiymdastyrý nietin qoldap, sonymen birge gýmanitarlyq dáliz boiynsha BUU-Resei-Ýkraina bailanys tobyn qurýdy usyndy.
Atap aitqanda, Gýterrish Mariýpolde "Azovstal" zaýytyndaǵy adamdardy evakýatsiialaý máselesin sheshýdi usyndy. BUU bas hatshysy keńsesiniń aqparatyna sáikes, Resei prezidenti zaýyt aýmaǵynda qalǵan beibit azamattardy evakýatsiialaý úshin Qyzyl krest jáne BUU-ny tartýǵa kelisken.
Vladimir Pýtin Mariýpolde áskeri qimyldar toqtaǵanyn, 1300-den astam ýkrain áskeri tutqynǵa túskenin, Reseidiń aralasýymen Mariýpolden 140 myń turǵyn evakýatsiialanǵanyn aitqan.
Gýterrish kelissóz kezinde Reseidiń Ýkrainadaǵy áreketin sýverendi elge basyp kirý dep atady. Al Pýtin Ýkrainaǵa basyp kirýge "májbúr" bolǵanyn, Ýkraina biliginiń kesirinen Donbass turǵyndary "oqshaýlanyp qalǵanyn" aitqan.
Bul - Resei Ýkrainaǵa basyp kirgeli beri BUU bas hatshysy Antoniý Gýterrishtiń Máskeýge alǵashqy sapary. 26 sáýirde Gýterrish Resei syrtqy ister ministri Sergei Lavrovpen de kezdesken.
BUU bas hatshysy Máskeýden Kievke attanady. Onyń saparyn Máskeýden bastaýyn Ýkraina prezidenti Vladimir Zelenskii synady. Zelenskii BUU bas hatshysy áýeli Resei áskeri qiratqan ýkrain qalalaryn kórip, odan keiin Máskeýge barýy tiis edi dep sanaidy.
