Resei prezidenti Vladimir Pýtin AQSh pen NATO Reseidiń qaýipsizdik talaptaryn elep eskermedi dep málimdedi. Bul jóninde ol Frantsiia prezidenti Emmanýel Makronmen sóilesken kezde aitqan. Eki basshynyń ekeýara áńgimesiniń mazmunyn Kreml saity jariialady, dep habarlaidy Azattyq.
Osyǵan deiin AQSh pen NATO Reseidiń qaýipsizdik boiynsha talaptaryna jaýap jibergen.
Pýtinniń sózine qaraǵanda, Máskeýge bergen jaýabynda Batys NATO-ny shyǵys baǵytta ulǵaitpaý, Reseimen shekarada qarý-jaraq ornalastyrmaý jáne áskeri áleýet pen infraqurylymdy 1997 jylǵy deńgeige túsirý siiaqty talaptaryn "elep eskermegen".
1997 jylǵa deiin NATO-ǵa Polsha, Chehiia, Vengriia, Bolgariia, Latviia, Litva, Estoniia, Rýmyniia, Slovakiia, Sloveniia, Horvatiia, Chernogoriia jáne Soltústik Makedoniia kirmegen edi.
Pýtinniń aitýynsha, Resei berilgen jaýapty "muqiiat qarastyryp", "ári qaraiǵy qadamyn anyqtaidy". Makronnyń oǵan ne dep jaýap bergeni Kreml habarlamasynda aitylmaidy.
Resei byltyr jyl sońynda AQSh-qa qaýipsizdik boiynsha birqatar talaptaryn jetkizgen. AQSh pen NATO "Resei olardyń bir bóligi oryndalmaitynyn bile tura jiberdi" dep sanaidy. Mysaly, NATO-ǵa jańa múshe qabyldamaý. Degenmen taraptar máselelerdi ári qarai da talqylai berýge kelisken.
Vashington Máskeýge bergen jaýapty jariialamaýdy ótingen.Biraq onymen New York Times basylymy tanysyp shyqqan. Basylymnyń jazýynsha, AQSh Reseimen áskeri jattyǵýlar men zymyrandarǵa, iadrolyq qarýǵa shekteý qoiý máselelerin talqylaýǵa daiyn.
