Resei prezidenti Vladimir Pýtin 29 tamyz kúni tikelei efirde zeinetaqy reformasynan soń zeinetke shyǵý jasy úkimet usynǵan jobadaǵydan azaitylatynyn málimdedi. Federaldyq telearnalar tikelei efirinde sóilegen Pýtin úkimet josparlaǵandai áielder zeinetke 63 emes, 60 jasta, al erler 65 jasta shyǵýy tiis ekenin aitty.
Qazirgi zań boiynsha, Reseide erler zeinetke 60 jasta, áielder 55 jasta shyǵady.
Pýtin sonymen qatar kóp balaly analardyń zeinetke merziminen buryn shyǵýy jáne zeinet jasyna jaqyndap qalǵan adamdardy jumystan bosatqany úshin jaýapkershilik engizý jaiyn qarastyrýdy usyndy.
Resei prezidenti úndeýinde 2000 jyldary zeinetaqy júiesin ózgertýge qarsy bolǵanyn jáne ol kezde bul ustanymynyń qisyny bolǵanyn málimdedi. Pýtin ol kezeńde Reseide jumyssyzdyq pen infliatsiia deńgeii joǵary bolǵanyn aitty. Biraq ol qazir "zeinetaqy reformasyn júrgizýdi keiinge qaldyrǵan jaǵdaida Zeinetaqy qorynyń biýdjetinde zeinetaqy tólemderin indeksatsiialaýǵa qarjy jetispei qalady" degen toqtamǵa kelgenin jetkizdi.
Vladimir Pýtin Resei qazir ekonomikalyq qiyndyqtardy eńsergenin, al jumyssyzdyq deńgeii 1991 jyldan bergi eń tómengi kórsetkishke túskenin aitady.
Ótken aptada Kreml Vladimir Pýtin taiaý ýaqytta qajet bolsa, zeinetaqy reformasyn jeńildetýi múmkin ekenin habarlaǵan. Buǵan deiin reseilik BAQ prezident áielderdiń zeinetke shyǵý jasyn 63-ten 60 jasqa deiin azaitatynyn habarlaǵan.
Shildeniń ortasynda Resei Memlekettik dýmasy zeinetke shyǵý jasyn erler úshin 65, áielder úshin 63 jasqa deiin ulǵaitý týraly úkimet usynǵan zań jobasyn alǵashqy oqylymda maquldaǵan edi. Zeinetaqy reformasy Reseidiń ondaǵan qalasynda halyqtyń narazylyǵyn týdyrǵan. Áleýmettik zertteý uiymdary biliktiń bul bastamasynan soń Vladimir Pýtinniń reitingi tómendep ketkenin anyqtaǵan.
