Foto: Aqorda
Memleket basshysy Qazaqstanǵa saparmen kelýge shaqyrýyn qabyl alǵany úshin Vladimir Pýtinge alǵys aitty, -dep habarlaidy Aqordanyń telegram arnasy.Qasym-Jomart Toqaevtyń aitýynsha, Qazaqstan men Resei ekijaqty seriktestiktiń oń qarqynyn saqtap qana qoimai, ony eselei túsken.
Sizdiń búgingi saparyńyzdyń kún tártibi óte aýqymdy. Sapar qarsańynda Úkimet músheleri kezdesip, biz talqylaityn barlyq máseleni pysyqtady. Búgin óte mańyzdy qujattardy qabyldaimyz. Bul 20 kelisimnen turatyn qujattar bizdiń tatý kórshilik jáne seriktestik rýhyndaǵy yntymaqtastyǵymyzdy odan ári damytýǵa tyń serpin beredi, – dedi Memleket basshysy.
Resei Prezidenti Vladimir Pýtin qazaq jerinde kórsetilgen erekshe syi-qurmet úshin Qasym-Jomart Toqaevqa alǵys aitty.
Sizge zor rizashylyǵymdy bildiremin. Biz dostas eldermiz. Qarqyndy damyp kele jatqan iskerlik qarym-qatynasty da qoldaimyz. Udaiy bailanystamyz. Ózińizdi jyl sońynda Sankt-Peterbýrgte ótetin TMD aiasyndaǵy beiresmi kezdesýde kútemin. Sondai-aq Uly Jeńistiń 80 jyldyǵyna arnalǵan saltanatty sharaǵa shaqyramyn. Bul – bizdiń ortaq jeńisimiz, – dedi Vladimir Pýtin.
Resei Prezidenti ekijaqty bailanystardyń qarqynyn joǵary baǵalap, memlekettik saparynyń máni men mańyzyna toqtaldy.
Búgingi kelissózderdiń qorytyndysy boiynsha birqatar qujat qabyldanady. Olardyń qatarynda Birlesken málimdeme jáne túrli saladaǵy yqpaldastyǵymyzǵa qatysty qujattar bar. Resei Qazaqstannyń eń iri saýda-ekonomikalyq seriktesiniń biri bolyp qala beredi. Saýda ainalymy ósti, byltyr onyń kólemi 28,5 milliard dollardy qurady. Qazaqstan ekonomikasyna quiylǵan investitsiia 13 milliard dollarǵa jetti. Árine, biz azamattyq qoǵam, bilim, ǵylym jáne mádeniet baǵytynda damyp kele jatqan gýmanitarlyq bailanystarymyzdy baǵalaimyz. Bul turǵyda Reseide bilim alatyn sheteldik stýdentterdiń basym bóligin qazaqstandyq jastar quraitynyn aitsaq jetkilikti. Aimaqaralyq yntymaqtastyq ta tabysty órbip keledi. Búgin Ýfada kezekti is-shara ótip jatyr. Sizge Resei-Qazaqstan yntymaqtastyǵyn damytýǵa erekshe nazar aýdarǵanyńyz úshin alǵys aitamyn. Biz Qazaqstan Prezidentiniń osynaý mańyzdy jumystarǵa árdaiym yqylas qoiyp otyratynyn jaqsy sezinemiz. Qazaqstandy adal dosymyz jáne jaqyn odaqtasymyz dep tanimyz, – dedi Resei Prezidenti.
Kelissóz barysynda memleketter basshylary ónerkásip kooperatsiiasy, energetika, munai-gaz ónerkásibi, energiia resýrstarynyń tasymaly, mashina jasaý, kólik-logistika, qarjy, ekologiia, sý saiasaty, bilim berý, ǵylym jáne mádeni-gýmanitarlyq salalardaǵy yqpaldastyqty damytý perspektivasyn talqylady.
