Patsientterdiń jaǵdaiyna qatysty shaǵymdardyń kóbeiýine bailanysty Qazaqstandaǵy jalǵyz respýblikalyq psihiatriialyq aýrýhana tekseriledi. Zańbuzýshylyqtar anyqtalǵan jaǵdaida jaýapty mamandar jaýapqa tartylýy múmkin, dep habarlaidy ult.kz.
Densaýlyq saqtaý ministrliginiń málimetinshe, buqaralyq aqparat quraldary men áleýmettik jelilerde mekemedegi patsientterdiń em alý jaǵdaiyna qatysty shaǵymdar kóbeigen. Osyǵan bailanysty Meditsinalyq jáne farmatsevtikalyq baqylaý komiteti aýrýhana qyzmetine keshendi tekserý júrgizýdi bastaidy.
Tekserý barysynda mamandar meditsinalyq qujattardy, emdeý protsesiniń uiymdastyrylýyn, patsientterdiń turmys jaǵdaiyn, sondai-aq laýazymdy tulǵalardyń áreketi men azamattardyń quqyqtarynyń saqtalýyn baǵalaidy.
Ministrlik ókilderi tekserý nátijesinde zańbuzýshylyqtar anyqtalsa, zańnamaǵa sáikes tiisti sharalar qabyldanyp, kináli tulǵalar jaýapkershilikke tartylatynyn málimdedi.
Atalǵan mekeme Qazaqstandaǵy osy baǵyttaǵy jalǵyz mamandandyrylǵan meditsinalyq uiym sanalady. Munda sot sheshimi negizinde meditsinalyq sipattaǵy májbúrleý sharalary taǵaiyndalǵan adamdar em qabyldaidy.
Aýrýhana qarapaiym statsionar emes: munda bir mezgilde aýyr psihikalyq buzylystary bar azamattarǵa arnaiy meditsinalyq kómek kórsetilip, sot sheshimderiniń oryndalýy qamtamasyz etiledi.
Mekeme málimetinshe, patsientterdiń 80 paiyzdan astamy jeke tulǵaǵa qarsy aýyr jáne asa aýyr qylmys jasaǵan adamdar. Sondyqtan aýrýhanada erekshe emdeý-qorǵaý rejimi qoldanylady.
