Foto: JI
Májilis depýtaty Ashat Aimaǵambetov Astanada liftte bolǵan oqiǵaǵa qatysty pikir bildirdi. Aita keteiik, qaiǵyly jaǵdai 11 aqpanda bolǵan, psihonevrologiialyq dispanserde esepte turǵan 14 jastaǵy jasóspirim liftte 5 jastaǵy balanyń betin tilgen. Bul týraly Ult.kz habarlaidy.
Aimaǵambetov bul oqiǵa tek qaiǵyly jaǵdai emes, sonymen qatar júielik máselelerdiń bar ekenin kórsetetin belgi dep esepteidi. Aitýynsha, bul jaǵdai psihikalyq turaqsyz jasóspirimniń kez kelgen balaǵa shabýyl jasaýy múmkin ekenin kórsetip berdi. Ol máseleni keshendi tásilder qoldaný arqyly ǵana sheshýge bolatynyn aitady, iaǵni erte anyqtaý, baqylaý jáne aldyn alý.
Osydan keiin depýtat qandai sharalar qabyldaýǵa bolatynyna toqtaldy:
Psihonevrologiialyq qyzmetterdi reformalaý
- Kámeletke tolmaǵandar arasynda psihikalyq buzylystardy diagnostikalaý men emdeýdi jetildirý.
- Reabilitatsiialyq baǵdarlamalardy damytý jáne minez-qulyqty baqylaý.
- Psihikalyq aýytqýy bar adamdarǵa kútim jasaý erejelerin týystaryna úiretý.
Ata-analarmen jumysty kúsheitý
- Eger qaýipti adam jaqyn jerde tursa, kórshiler men mektepterge mindetti túrde aqparat berý.
- Esepte turǵan adamdardyń jaǵdaiy men minez-qulqyn tekserý.
- Agressivti azamattardy ýaqytsha oqshaýlaý múmkindigin qarastyrý.
Turǵyn úi keshenderindegi qaýipsizdik
- Liftterde, kireberisterde jáne aýlalarda beinebaqylaýdy qamtamasyz etý.
Psihikalyq aýytqýy bar balalardy tárbielep otyrǵan otbasylardy qoldaý
- Áleýmettik qyzmetkerlerdi jumyldyrý.
- Úzdiksiz jáne basymdyqty dári-dármekpen qamtamasyz etý jáne meditsinalyq kómek.
- Minez-qulyqty baqylaý jáne túzetý.
- Psihologiialyq qyzmetterdiń jumysyn jandandyrý.
Zańdy ókilderdiń jaýapkershiligi
- Ata-analarǵa kámeletke tolmaǵan balalarynyń quqyqbuzýshylyqtarynyń saldary týraly qosymsha túsindirý jumystaryn júrgizý.
- Eger otbasy balany baqylaýda ustai almasa, monitoring pen reabilitatsiia nátijeleri boiynsha qosymsha qoldaý sharalary qabyldanýy tiis.
"Operativti qyzmetterdiń jedel áreket etip, bilikti meditsinalyq kómek kórsetkeni jáne qylmystyq is qozǵalǵany nazarǵa alynýy kerek", - dep jazdy Aimaǵambetov.
Depýtat balaǵa tez saýyǵyp ketýin tilei otyryp, májiliste qazirgi ýaqytta psihologiialyq qyzmetter salasyndaǵy máselelerdi sheshýge baǵyttalǵan zań jobasy boiynsha jumys jasap jatqandaryn aitty.
