Búgin QR Densaýlyq saqtaý ministrliginiń «Otan soǵysynyń múgedekterine arnalǵan Ortalyq klinikalyq gospitalinen» koronavirýs infektsiiasyn juqtyrǵan sońǵy patsient emdelip shyqty, dep habarlaidy QazAqparat tilshisi.
7 apta ishinde gospitalge COVID-19 juqtyrýy múmkin 18-90 jas aralyǵyndaǵy 730 patsient túsip, onyń ishinde 335 patsient oń nátijemen basqa statsionarlarǵa aýystyrylǵan. Qalǵandary gospitalde emdeldi. Birde-bir ólim oqiǵasy bolǵan joq.
«Jasym 68-de. Buǵan deiin Jambyl oblysynyń Jambyl aýdany Asa aýylynda 10 kún aýrýhanada jattym. Ol jaqtaǵy dárigerler de aianbai eńbek etip, qoldan kelgenniń bárin istedi. Olarǵa da rahmet! Keiin osy jerde aýystyrylyp, taǵy 12 kún emdeldim. Aýa jetpei, entigip kelip edim. Ókpeni jasandy jeldetý apparatyna qosyp, dári-dármekpen emdedi. Osy qiyndyqtyń bári artta qalsyn. Aldymen bir Allaǵa syiynamyz, odan keiin dárigerler halyqtyń janyn aman alyp qalyp, emdep jatyr. Osy jerdegi ujymǵa kóp rahmet!», - deidi emdelip shyqqan sońǵy patsient Kenjetai Kóshetov.
23 maýsymnan bastap QR Densaýlyq saqtaý ministrliginiń buiryǵymen atalǵan meditsinalyq uiym provizorlyq gospital bolǵan.
«Osy gospitalde emdelgen sońǵy naýqas búgin shyǵaryldy. Allaǵa táýbe, naýqastardy jaqsylap emdegen dárigerlerge rahmet! QR Densaýlyq saqtaý ministrliginiń buiryǵymen 23 maýsymnan bastap bul gospital provizorlyq gospital boldy. Eki aidyń ishinde 700-den astam adam emdeldi. Onyń ishinde 356 adamdy ózimiz emdep, osy jerden úiine jiberdik. Qalǵan naýqastar basqa aýrýhanalarǵa aýystyryldy. Koronavirýs infektsiiasyn juqtyrǵan adamdardy emdeý barysynda ólim jaǵdaiy bolǵan joq», - deidi «Otan soǵysynyń múgedekterine arnalǵan Ortalyq klinikalyq gospitali» direktorynyń orynbasary Serik Shahmetov.
Ol buryn mundai tájiribe bolyp kórmegenin aitty.
«Bastapqy eki aptada qiyn boldy. Ýaqyt óte kele qiyndyqty eńserip, úirendik. Endi koronavirýs infektsiiasynyń ekinshi tolqyny bolmai qoisyn dep tileimiz. Tipti bola qalǵan kúnniń ózinde ony da jeńemiz. Endi biz jabylyp, eki apta boiy ǵimarattyń ishi-syrtyn tazartý jumystaryn jasaimyz. Bári jaqsy bolsa 1 qyrkúiekten bastap burynǵy rejimde jumys istei bastaimyz», - deidi ol.
