«DALA insaid» Telegram-arnasy propagandist Tigran Keosaiannyń kýratoratyn tapty, dep habarlaidy halyq-uni.kz saity.
«Keosaiannyń qojaiynyn izdestirýge atsalysqan amerikalyq áriptesterge alǵystan basqa aitarymyz joq. Bizge jetken málimet boiynsha, erli-zaiypty Simonian men Keosaian Resei prezidenti ákimshiligi jetekshisiniń birinshi orynbasary Aleksei Gromovqa baǵynady. Pýtindik propaganda dep atalatyn ekojúieniń «jaiaý áskerine» jón siltep, baǵyt-baǵdar beretin dál osy Gromov. Kreml kýlýarynda ony «Kýrator» deidi. Bulardyń óz arasynda «asa qupiia taqyryptardy» talqylaityn «sary telefon» bar. Eshkimge tiispei tynysh jatqan Qazaqstanǵa soqtyǵý týraly buiryq osy «sary telefonnan» túsken. Tigrannyń aldyndaǵy mátin de Gromovtyń maquldaýynan ótken», - delingen habarlamada.
Sonymen Gromov kim degen suraqqa «DALA insaid» bylaisha jaýap beredi.
«Ol - memqupiia sanatyndaǵy málimettiń syrtqa taramaýyn, azat oily, táýelsiz kontenttiń zombilanǵan orys qoǵamyna ótip ketpeýin baqylaityn tulǵa. Pýtindi pir tutatyn aqparattyq saiasattyń tóbe basynda tur. Kremlge baǵynyshty BAQ-tyń jumysyn júieleitin de sol.
Gromov - Margarita Simonian basshylyq etetin Russia Today-dyń negizin qalaýshylardyń biri. Kremldiń pýlyna kirgen Simoniandy qolynan jetektep RT-ǵa ertip ákelgen de, keiinnen «Rossiia segodnia» agenttiginiń tizginin ustatqan da ózi.
Simonian - Gromovtyń sybailasy. 2013 jyly áielinen ajyrasyp, Margaritanyń qushaǵyna kirgen Tigran Keosaian da Gromovtyń senimdi adamdarynyń sapynda. Propagandaǵa bólingen asta-tók aqshany osy «úshtik» birigip igeredi.
Kreml kósemimen 1988 jyly Pragada tanysqan. Aldymen Eltsinniń, keiin Pýtinniń baspasóz hatshysy (Peskovke deiin) boldy. 2000-jyldardyń bas kezinde táýelsiz NTV arnasyna basa-kóktep kirip, arnany Pýtinge tartyp áperýge atsalysty.
Medianaryqqa bólingen milliardtar aldymen Gromovtyń ámiianyna aýady, artynan Simonian, Keosaian sekildi úgit-nasihatshylarǵa úlestiriledi. Gromovty beiresmi «Propaganda ministri» dep te ataidy.
Bizge jetken málimet boiynsha Kreml kósemine qajetti «daidjesti» daiyndaityn Gromov Keosaiannyń aýzymen aitylǵan ala-qula aqparatty Pýtinniń aldyna alyp barǵan», - delingen jaýapta.
Al jańaǵy «sary telefon» týraly aitqanda «DALA insaid» 23 jyl boiy Pýtinniń janynan uzamai júrgen Gromovtyń jańa tehnikanyń tilin túsinbeitinin, áli kúnge deiin knopkaly telefondy qoldanatynyn aitady.
«Bul turǵyda Pýtin ekeýi uqsas. Qazaqstanǵa jasalǵan aqparattyń shabýyldyń artynda Reseidiń prezidentiniń ákimshiligi tur. Gromovtyń taǵy da qandai provokatsiiaǵa barary belgisiz. Al Keosaian bolsa «sary telefondy» ainalsoqtap, prezident ákimshiliginen túsetin qońyraýdy kútip júr deidi», - dep toqeterin jazady «DALA insaid».
