Olimpiada chempiony Daniiar Eleýsinov Niý-Iorkte ótken baspasóz máslihatyna qatysty. 28 sáýir kúni ol kásibi bokstaǵy alǵashqy jekpe-jegin ótkizedi, dep habarlaidy QazAqparat tilshisi.
Baspasóz máslihatyn D.Eleýsinovtiń promoýteri Eddi Hirn júrgizdi. Ol aldymen qazaqstandyq boksshyny tanystyrdy. Odan keiin qazaqstandyq boksshyǵa sóz berdi. D.Eleýsinov óz rizashylyǵyn aǵylshyn tilinde jetkizdi. Eddi Hirn bolsa, taǵy qazaqsha tilek bildirýdi ótindi. Osy kezde Daniiar sál sasyp qalyp, oryssha sóilei bastady. Biraq janynda turǵan aýdarmashy oǵan qazaq tilinde sóileý kerektigin túsindirdi.
«Men óte qýanyshtymyn. Búgin baspasóz máslihaty ótip jatyr. Erteń, senbi kúni birinshi jekpe-jegime shyǵamyn. Búkil qazaq halqyn qýantyp, jeńiske jetemin dep úmittenemin. Álem chempiony bolsam deimin. Barlyqtaryńyzǵa raqmet! Jankúier bolyńyzdar!», - dedi D.Eleýsinov.
Aita keteiik, Daniiar Eleýsinovtiń qarsylasy - amerikalyq Noa Kidd. Olardyń jekpe-jegi Deniela Djeikobs men Matsei Sýletski arasyndaǵy aiqastyń anderkartynda ótedi. Boks keshi Barclays arenada bolady.
