Almaty oblysynyń Panfilov aýdandyq sotynda shildeniń 23-i kúni Qytai azamaty, "shekaradan zańsyz ótti" dep aiyptalǵan etnikalyq qazaq Sairagúl Saýytbaidy Qytaiǵa qaitarý máselesi boiynsha sot otyrysy jalǵasty. Jarkent qalasynda ótken sot protsesinde prokýror Arzygúl Imiarova aiyptalýshynyń advokaty Abzal Quspannyń protsessýaldyq kelisim jasasý týraly usynysynan bas tartty. Prokýror kelisimnen bas tartý sebebin túsindirmedi.
Budan soń sýdia Dinara Quiqabaeva sottyń jaryssóz kezeńin 25 shildege belgilemek bolǵan edi. Biraq Sairagúl Saýytbaidyń advokaty Abzal Quspan 30 shildege deiin issaparda bolatynyn aityp, sot otyrysyn 1 tamyzǵa qaldyrýdy surady. Sýdia ony maquldady.
13 shildede ótken sotta prokýror Sairagúl Saýytbaiǵa Qazaqstan Qylmystyq kodeksiniń 392 - baby ("shekarany zańsyz buzyp ótý") boiynsha aiyp taqqan. Qazaqstan zańy boiynsha, ol aiypty dep tanylsa, elden shyǵarylady.
Sot tergeýi kezinde Sairagúl Saýytbai ózine taǵylǵan aiypty tolyq moiyndaitynyn aityp, prokýrormen protsessýaldyq kelisim jasasýdy suraǵan. Ol ózine Qytaida "saiasi qysym jasalǵandyqtan shekaradan zańsyz ótýden ózge jol qalmaǵanyn" málimdegen. Saýytbaidyń sózinshe, ol Qytaida qupiia sanalatyn "saiasi úirený ortalyqtarynda" jumys istegen, "memleket qupiiasyn áshkerelemeý" týraly qolhat bergen. Sairagúl Saýytbai Qytaiǵa qaitarylsa, ol elde ózine ólim jazasy kesilýi múmkin ekenin, Qazaqstanda qandai jazaǵa da kelisetinin málimdegen.
Búgin túske deiin bastalǵan sot protsesinde prokýror Sairagúl Saýytbaidyń advokaty Abzal Quspannyń protsessýaldyq kelisim jasasý týraly ótinishin qaraýǵa saǵat 16-ǵa deiin úzilis jariialaýdy suraǵan.
Sairagúl Saýytbaidyń kúieýi Ýáli Islám biyl mamyrda áielin Qazaqstan Ulttyq qaýipsizdik komitetiniń qyzmetkerleri "Qorǵas keden beketin zańsyz buzyp ótti" degen aiyppen ustaǵanyn habarlaǵan. Keiinirek Sairagúl Saýytbaidyń Taldyqorǵandaǵy tergeý izoliatorynda otyrǵany belgili bolǵan.
Týystarynyń aitýynsha, "Sairagúl Saýytbai Qytaida balabaqshada jumys istegen jáne aimaqtaǵy saiasi tárbie lagerlerinde muǵalimder daiyndaǵan. Biýdjetten aqsha alǵandyqtan ol memlekettik qyzmetker sanatyna kirip, Qytai onyń syrtqa shyǵýyna ruqsat bermei otyr".
Sairagúl Saýytbaidyń kúieýi Ýáli Islám men eki balasy Qazaqstan azamattyǵyn alǵan. Erli-zaiypty Ýáli Islám men Sairagúl Saýytbai eki balasymen birge Qazaqstanǵa 2016 jyly kóship kelmek bolǵan.
