Nur-Sultan qalasy №2 Saryarqa aýdandyq sotynda prokýror Baýyrjan Shekenov burynǵy densaýlyq saqtaý ministri Eljan Birtanov pen onyń burynǵy orynbasary Oljas Ábishevke qandai aiyp taǵylǵanyn aitty, - dep habarlaidy Tengrinews.kz.
Birtanovqa meditsinalyq mekemeler qyzmetin avtomattandyrý jáne olardy basqarý úshin aqparattyq júieni - "Densaýlyq saqtaýdyń aqparattyq júielerin aqparattandyrý jáne interoperabeldik platformasyn" ázirleý kezinde laýazymdy ókiletin asyra paidalandy dep aiyp taǵylǵan. Platforma azamattardy meditsinalyq mekemelerge tirkeý, dárigerdi úige shaqyrý, dárigerdiń qabyldaýyna jazylý, sondai-aq, halyqqa meditsinalyq kýálik berý qyzmetterin avtomattandyrýdy qamtamasyz etýge arnalǵan.
Taǵylǵan aiyp boiynsha, 2015 jylǵy jeltoqsanda Densaýlyq saqtaý ministrligi horvatiialyq Ericsson Nikola Tesla firmasymen platformany bir jylda ázirleý úshin quny 17,8 million dollar bolatyn kelisimshart jasasqan. Platformany ázirleý respýblikalyq biýdjet jáne Dúniejúzilik bank qaryz qarajaty esebinen josparlanǵan.
Alaida bir jylda platforma daiyn bolmaǵan. 2016 jylǵy qazanda jáne 2017 jylǵy maýsymynda Densaýlyq saqtaý ministrligi jetkizýshimen kelisimshart merzimin eki ret uzartqan.
"Jetkizýshi 2017 jylǵy 1 qarashaǵa deiin platforma boiynsha jumystardy aiaqtai almaityny týraly aqparat vitse-ministr Aleksei Tsoi arqyly platforma jetkizýshisinen kelisimshart somasynyń 10 paiyzy nemese 2 226 571 dollar mólsherinde aiyppul sanktsiialaryn óndirip alý usynysymen jazbasha túrde Birtanovqa berilgen.
Ministr Birtanov biýdjet qarajatyn igermegeni úshin el basshylyǵy aldyndaǵy tikelei jaýapkershiliginen qorqyp, 2017 jylǵy qarashada vitse-ministr Tsoiǵa oryndalǵan jumystardyń aktilerine qol qoiýǵa jáne platformany tolyq kólemde qabyldaýǵa nusqaý bergen", - dedi prokýror sotta.
Taǵylǵan aiyp málimeti boiynsha, Tsoi ministrdiń buiryǵyn oryndaýdan jáne aiaqtalmaǵan platformany qabyldaýdan bas tartqan. Nátijesinde, bólingen 2,9 milliard teńge igerilmei qalyp, memlekettik biýdjetke qaitarylǵan. 2017 jylǵy 1 qarashada platformany jetkizý jónindegi kelisimsharttyń jáne Dúniejúzilik bankpen kelisimniń merzimi ótip ketken, sóitip, kelisimshartty uzartý múmkindigi bitken.
Úkimet platformany 2018 jylǵy jeltoqsanda iske qosý týraly sheshim qabyldaǵan.
"Birtanov platformany aitylǵan merzimde aiaqtaýǵa respýblikalyq biýdjet qarajatynan qosymsha 6,8 million dollar nemese 2,9 milliard teńge bólýge ótinim jiberýge sheshim qabyldaǵan. (...)
2018 jylǵy 6 maýsymda óziniń zańsyz nusqaýlaryn múltiksiz oryndatý úshin Birtanov buryn birge jumys istegen tanysynyń tsifrlandyrý máseleleri boiynsha densaýlyq saqtaý vitse-ministri laýazymyna taǵaiyndalýyna yqpal etken. Vitse-ministrdiń mindetine densaýlyq saqtaý júiesin jańǵyrtý jáne ony tsifrlandyrý boiynsha jobalardy iske asyrý kirgen", - dedi prokýror.
Aiyptaýshylardyń aitýynsha, Birtanov óziniń laýazymdyq ókiletin asyra paidalanyp, 2018 jylǵy 5 qazanda №569 buiryǵy boiynsha aiaqtalmaǵan platformany pilottyq túrde paidalanýǵa engizgen.
"Pilottyq túrde paidalaný Nur-Sultan, Batys Qazaqstan jáne Shyǵys Qazaqstan oblystarynyń 17 emdeý mekemesinde kózdelgen. Alaida is júzinde bul meditsinalyq uiymdarda platforma pilottyq túrde paidalanylmaǵan, óitkeni onyń jumystary aiaqtalmaǵan.
2018 jylǵy 11 jeltoqsanda Ábishev ministr Birtanovtyń zańsyz nusqaýlaryn oryndap, platformanyń pilottyq túrde paidalanylýyn sátti aiaqtaý týraly sertifikat bergen. Sonymen qatar, platforma boiynsha barlyq jumys oryndalmaǵan, jetkizýshi onyń tolyq jumysyn qamtamasyz etpegen", - dedi prokýror.
Ol 2018 jylǵy 12 qarashada Birtanov boljaldy oryndalǵan jumystardy qabyldaý jáne kelisimshart boiynsha tiisti aktilerge qol qoiý jónindegi komissiia qurý týraly buiryqqa qol qoiǵanyn, sodan keiin 2018 jylǵy 27 qarashada jazbasha buiryq shyǵarǵanyn, onda komissiiaǵa 2018 jylǵy 5 jeltoqsanǵa deiin platformany qabyldaýdy qamtamasyz etýdi mindettegenin atap ótti.
"Densaýlyq saqtaý ministrligi men vedomstvolyq baǵynysty uiymdardyń qyzmetkerleri sanalatyn qabyldaý komissiiasynyń músheleri platforma durys jumys istemeitinin bilse de, ministr Birtanov pen Ábishevke baǵynyshty bolyp, ekinshisiniń qysymymen qabyldaý komissiiasy otyrysynyń 2018 jylǵy 11 jeltoqsandaǵy hattamasyna platformanyń qabyldaýǵa jáne odan ári paidalanýǵa daiyndyǵy týraly qol qoiǵan. Bul rette platformany qabyldaý synaqtary is júzinde júrgizilmegen", - dedi prokýror.
Dálel retinde prokýrorlar 2018 jylǵy 10 jeltoqsannan bastap Ábishev pen Erikson arasynda platformany aiaqtaý merzimin 2019 jylǵy 5 qarashaǵa deiin uzartýǵa jasalǵan qosymsha kelisimdi keltiredi.
"Birtanov pen Ábishev qosymsha kelisim olardyń zańsyz áreketiniń dáleli ekenin, bul 2018 jyly aqshanyń igerilýine kedergi keltiretinin bildi, sondyqtan olar memlekettik baǵdarlamany iske asyrýdan bas tartqany jáne bólingen qarajattyń igerilmegeni úshin jaýapkershilikten qashý úshin onyń bar ekeni týraly aqparatty ádeii jasyrǵan", - dedi prokýror.
Onyń aitýynsha, Densaýlyq saqtaý ministrligi men Tsifrlandyrý jáne aeroǵarysh ónerkásibi ministrligi platformany 2022 jylǵy 31 tamyzda ǵana paidalanýǵa berýdi josparlap otyr. Onyń aitýynsha, platforma osy ýaqytqa deiin jumys istemeidi.
Nátijesinde, prokýrorlar Birtanov pen Ábishevtiń áreketteri memleketke platforma boiynsha is júzinde oryndalmaǵan jumystarǵa aqy tóleý túrinde asa iri mólsherde, iaǵni 4,1 million dollar shyǵyn keltirgenin aitty. Bul Ulttyq banktiń 2018 jylǵy 12 jeltoqsandaǵy baǵamy boiynsha 1,5 milliard teńge bolady.
Jeke aiyptaý Eljan Birtanovtyń 2020 jyly pandemiia bastalǵan kezde sanaviatsiiany qoldanýyna qatysty bolyp otyr.
"2020 jylǵy 12 maýsymda Birtanov Jambyl oblysynda kómekshisi Shaiahmetovpen qyzmettik issaparda júrgende, Tarazdaǵy qonaqúi ǵimaratynda PTR-test tapsyrǵan. Sanitariia aviatsiiasynyń qupiialylyǵy men odan ári zańsyz paidalaný sharttaryn saqtaý úshin Birtanov jeke derekter retinde "A.A. Nurov" degen oidan shyǵarylǵan tekti paidalanǵan. PTR-testiniń nátijeleri teris bolǵan. Soǵan qaramastan, Birtanov Tarazdan Nur-Sultanǵa ushýdy uiymdastyrý úshin sanitariia aviatsiiasynyń áýekemesin berý týraly zańsyz nusqaý bergen", - dedi prokýror.
2020 jylǵy 13 maýsymda Birtanov Nur-Sultanǵa ushqan. Birtanov ushyp kelgen boida "eki jaqty polisegmentti pnevmoniia" diagnozymen elordalyq infektsiialyq ortalyqqa jatqyzylǵan.
"Jambyl oblysynyń meditsinalyq mekemelerinde 1 439 bos oryn bar. Birtanovty shuǵyl tasymaldaý jáne áýekemesin jeke maqsatta paidalaný qajettiligi bolǵan joq. Birtanovty Tarazdan Nur-Sultanǵa tasymaldaý tapsyrmasy boiynsha qyzmet quny 5,5 million teńge bolyp otyr, bul respýblikalyq biýdjet qarajatynan tólengen", - dep qorytyndylady memlekettik aiyptaýshy.
Aita keteiik, búgin sot burynǵy densaýlyq saqtaý ministri Eljan Birtanovtyń burynǵy premer-ministr Asqar Mamindi, vitse-premer Eraly Toǵjanovty jáne eki ministrdi qorǵaýshy kýáger retinde shaqyrý týraly ótinishin qanaǵattandyrdy.
