Batys Qazaqstan oblysyna jumys sapary aiasynda QR Premer-Ministri Álihan Smaiylov óńirdiń áleýmettik-ekonomikalyq damý máseleleri jóninde keńes ótkizdi, dep habarlaidy "Ult aqparat" Úkimettiń resmi saityna silteme jasap.
Keńesti ashqan Premer-Ministr birinshi kezekte oblystyń sheshilmegen basty máseleleriniń birine toqtaldy.
«Keshe ǵana Prezident «Egemen Qazaqstan» gazetindegi Batys Qazaqstan oblysynyń joldarynyń jaǵdaiyna arnalǵan «Kúre joldaǵy kúrsinis» maqalasyn oqyp, maǵan jáne oblys basshylyǵyna barlyq qajetti sharany tez arada qabyldaýdy tapsyrǵanyn bilesizder. Ǵali Nájimedenuly (Esqaliev – BQO ákimi), osydan týra bir jyl buryn dál osy salaǵa jaýapty orynbasaryńyz Prezidenttiń tapsyrmasymen qyzmetinen bosatylǵan edi. Bir jyl ótse de, problema áli sheshilmegen. Óńirdiń problemalary tez ári tiimdi sheshilýi úshin únemi Prezident aralasyp, tapsyrma berýi qajet pe?» — dedi Álihan Smaiylov.
Óz kezeginde oblys ákimi Ǵali Esqaliev joldardyń nashar jai-kúiiniń negizgi sebebi qarjylandyrýdyń jetkiliksizdigimen jáne pandemiianyń áserimen bailanysty ekenin atap ótti. Ótken jyly jergilikti mańyzy bar 330 shaqyrym jol jóndeldi. Oblys ortalyǵyn Kaztalov, Jánibek jáne Bókei ordasy aýdandarymen bailanystyratyn avtojoldy jóndeý jumystary jalǵasýda. Biyl bul maqsatqa 15 mlrd teńge qarastyrylǵan.
Álihan Smaiylov oblys ákimi men Indýstriia jáne infraqurylymdyq damý ministrine Memleket basshysynyń tapsyrmasyn sapaly ári ýaqytyly oryndaýdy qamtamasyz etýdi tapsyrdy.
Sonymen qatar keńeste Indýstriia jáne infraqurylymdyq damý ministri Qaiyrbek Óskenbaev, Energetika birinshi vitse-ministri Murat Júrebekov, Densaýlyq saqtaý birinshi vitse-ministri Marat Shoranov, Aýyl sharýashylyǵy birinshi vitse-ministri Aidarbek Saparov, Ulttyq ekonomika vitse-ministri Baýyrjan Omarbekov jáne Qarjy vitse-ministri Daniiar Janalinov baiandama jasady.
Baiandamashylardy tyńdaǵan Premer-Ministr Batys Qazaqstan oblysynda munai óńdeý, mashina jasaý jáne keme jasaý salalary, qurylys indýstriiasy jáne azyq-túlik óndirisi damyp kele jatqanyn, bul – BQO-ny elimizdiń mańyzdy indýstriialyq-agrarlyq óńirleriniń birine etetinin atap ótti.
«Memleket basshysynyń tapsyrmasy boiynsha biyl aqpan aiynda Óńirdi áleýmettik-ekonomikalyq damytýdyń 2025 jylǵa deiingi keshendi jospary qabyldandy. Jospardaǵy is-sharalardy qarjylandyrý 2,6 trln teńgeni quraidy. Bul birqatar mańyzdy jobany iske asyrýǵa, jańa ónimder shyǵarýǵa, jańa jumys oryndaryn qurýǵa, halyqtyń turmys sapasyn jaqsartýǵa múmkindik beredi. Óńirdiń aldaǵy ýaqyttaǵy negizgi mindeti atalǵan jobalardy ýaqytyly ári sapaly iske asyrý bolýy kerek», — dedi Álihan Smaiylov.
Úkimet basshysynyń aitýynsha, 2022 jylǵa arnalǵan respýblikalyq biýdjette Batys Qazaqstan oblysyna 103,4 mlrd teńge somasynda shyǵyn qarastyrylǵan. Biýdjetti naqtylaý barysynda taǵy da 32,2 mlrd teńge bólindi. Bul shyǵystar óńirdiń infraqurylymyn damytýǵa jáne áleýmettik qajettilikterine: avtomobil joldaryn jóndeý men rekonstrýktsiialaýǵa, sýmen jabdyqtaý júielerin damytýǵa, múgedekterdi ońaltý ortalyǵyn salýǵa, densaýlyq saqtaý júiesin qoldaýǵa, indýstriialyq aimaqtyń qurylysyna, elektrmen jáne gazben jabdyqtaýǵa, ózen jaǵalaýyn bekitý jumystary men tasqyn sýdan qorǵaýǵa, bilim berý obektilerin jóndeýge jumsalady.
Buǵan qosa, biýdjetti naqtylaý kezinde agroónerkásiptik keshendi qoldaýǵa, óńirlik eńbek naryǵyn damytýǵa jáne «Aýyl – El besigi» jobasyna qarajat bólindi.
«Bul qarajatty maqsatty túrde tiimdi igerip, sapaly nátijelerge qol jetkizý qajet», — dedi Álihan Smaiylov.
Premer-Ministr basqa da birqatar máselege toqtaldy. Atap aitqanda, ol búgingi tańda álemde azyq-túlik taýarlary baǵasynyń kúrt óskeni baiqalatynyn eske saldy. Osyǵan bailanysty Úkimet pen óńirler ákimderiniń negizgi mindeti – baǵanyń negizsiz qymbattaýyna jol bermei, óz naryǵymyz úshin álemdik baǵa ósiminiń áserin barynsha azaitý.
«Oblysta jyl basynan beri áleýmettik mańyzy bar azyq-túlik taýarlarynyń baǵasy 14%-ǵa ósken. Ákimdik baǵa ústemesine baqylaýdy kúsheitýi qajet. Ońtústik óńirlerden jáne Ortalyq Aziiadaǵy kórshiles elderden erte pisetin kókónisterdi ákelý úshin tikelei sharttarǵa otyrý kerek. Tapshylyqty jáne baǵanyń negizsiz ósýin boldyrmaý úshin forvardtyq shema boiynsha aýyl sharýashylyǵy ónimderin satyp alý máselesin pysyqtaý qajet», — dep atap ótti QR Premer-Ministri.
Álihan Smaiylov óńir ekonomikasy negizinen «Qarashyǵanaq Petroliým Opereiting» kompaniiasynyń qyzmetine táýeldi ekenin aitty. Sondyqtan, ekonomikany ártaraptandyrý úshin biyl óńirde mashina jasaý, metallýrgiia, munai óńdeý, farmatsevtika, tamaq ónerkásibi, qurylys materialdary óndirisi salalarynda jalpy quny 243,8 mlrd teńgeni quraityn 37 jobany iske qosý josparlanyp otyr.
Otyrys qorytyndysy boiynsha Álihan Smaiylov ortalyq memlekettik organdarǵa birqatar tapsyrma berdi: Indýstriia jáne infraqurylymdyq damý ministrligine ákimdikpen birlesip, jyl sońyna deiin jergilikti joldardyń normativtik jaǵdaiyn qazirgi 39%-dan 46%-ǵa deiin kóterý; Energetika ministrligine: Batys Qazaqstan oblysyn turǵyndar úshin qolaily baǵadaǵy taýarlyq gazdyń qosymsha kólemimen qamtamasyz etý múmkindigin qarastyrý; Oral jylý elektr ortalyǵyn rekonstrýktsiialaý úshin respýblikalyq biýdjetten qarjy bólý máselesin pysyqtaý; 1 shildege deiin oblys aýmaǵynda gaz-himiia keshenin qurý jáne ony shikizatpen qamtamasyz etý máselesin pysyqtaý; Qarjy, Ulttyq ekonomika ministrlikteri jáne ákimdikpen birlesip, óńirdegi tozyǵy jetken elektr jelilerin azaitý máselesin pysyqtaý tapsyryldy.
Sondai-aq Úkimet basshysy Energetika ministrligine Ulttyq ekonomika, Densaýlyq saqtaý, Qarjy ministrlikterimen birge 77 tirek jáne 109 spýtniktik aýyldy damytý úshin jáne óńirdiń meditsinalyq jelisin jańǵyrtý úshin qosymsha qarjylandyrý múmkindigin qarastyrýdy tapsyrdy.
Aýyl sharýashylyǵy ministrligine ákimdikpen birge, Batys Qazaqstan oblysyn etti mal sharýashylyǵyn damytýdyń ǵylymi óndiristik bazasy retinde aiqyndaý máselesin pysyqtaý tapsyryldy.
«Memleket basshysy aldymyzǵa naqty mindetterdi júktedi. Halyq jańa Úkimetke jáne jergilikti bilikke úmitpen qarap otyr. Sol senimdi aqtap, úmittiń údesinen shyǵý – paryzymyz. Árbir isimiz sapaly, kópshilikke paidaly bolýy kerek», — dep túiindedi Premer-Ministr.
