2021 jyldyń 6 aiynda 35 myń otbasyǵa járdemaqy proaktivti formatta taǵaiyndaldy. Bul týraly QR Eńbek jáne halyqty áleýmettik qorǵaý ministrligi Áleýmettik kómek saiasatyn damytý departamentiniń direktory Asqar Niiazov aitty, dep habarlaidy QazAqparat.
«Otbasylarǵa járdemaqy tóleýge proaktivti format engizip otyrmyz. Proaktivti formatta qyzmet alýshydan ótinish talap etilmeidi. Iaǵni, qyzmet alýshy bala týǵan kezde nemese kóp balaly otbasy bolǵanda SMS habarlamany quttyqtaý mátinde jibere otyryp, qosymsha qoldaý is-sharalaryn alýǵa múmkindigi bar ekendigin aitamyz. Azamattardan talap etiletindigi jiberilgen SMS habarlamamyzǵa dereý jaýap berse bolǵany. Habarlama jiberýdegi maqsatymyz - otbasyǵa áleýmettik kómek alýǵa ruqsatyn alý. Iaǵni, zańnamaǵa sáikes biz azamattardyń ruqsatynsyz qosymsha kómek taǵaiyndaýǵa quqyly emespiz», - dedi ol Ortalyq kommýnikatsiialar qyzmetindegi brifing barysynda.
Onyń dereginshe, osy jyldyń 6 aiynda 35 myń otbasyǵa járdemaqy proaktivti formatta taǵaiyndaldy.
«Jalpy, osy 6 aidyń ishinde proaktivti formatta járdemaqy taǵaiyndaý úshin jiberilgen SMS habarlamalardyń sany 180 myńnan asady. Ókinishke orai 145 myńǵa jýyq habarlamamyz azamattar tarapynan jaýapsyz qaldy», - dedi Asqar Niiazov.
