Foto: Konkord Company Press Service/ITAR-TASS/IMAGO
Evgenii Prigojin Resei Qorǵanys ministrligi onyń jaýyngerlerine oq-dáriler jetkizbei jatqanyna taǵy da shaǵymdandy.
"Vagner" qysqa ýaqyttan keiin óz qyzmetin toqtatady, dedi ol reseilik blogerge bergen suhbatynda.
Donetsk oblysyndaǵy Bahmýt qalasynda jaýyngerleri birneshe aidan beri soǵysyp jatqan "Vagner" jeke áskeri kompaniiasynyń basshysy Evgenii Prigojin qurylym óz qyzmetin toqtatýy múmkin degen pikir bildirdi.
"Vagner" belgili bir ýaqyttan keiin óz qyzmetin toqtatady", - dedi ol reseilik bloger Semen Pegovke bergen suhbatynda.
"Biz tarihta qalamyz. Eshteńe etpeidi, bulai bolýy zańdylyq", - dep qosty Prigojin.
Áleýmettik jelide jariialanǵan videorolikke qaraǵanda, "Pýtinniń aspazy" jeke áskeri qyzmetiniń toqtatylýyn Resei Qorǵanys ministrliginiń jaldamalylarǵa oq-dáriler jetkizbeitindigimen bailanystyrady.
Prigojinniń snariad jetispeýshiligine shaǵymdanýy jáne Resei áskeri basshylyǵynyń jekelegen múshelerin "el múddesine opasyzdyq jasady" dep aiyptaýy alǵash ret emes. Ázirge onyń bul málimdemeni qashan jasaǵany belgisiz. Ol BAQ ókilderiniń aitylǵan jaitqa túsinikteme berý týraly ótinishine de jaýap bergen joq.
Reuters agenttiginiń habarlaýynsha, Evgenii Prigojin ótkir de sarkazmdyq málimdemelerimen tanymal, sondyqtan onyń sóziniń qanshalyqty salmaqty bolǵanyn dóp basyp aitý múmkin emes. Keshe ol "ýkrain áskerine qalany amerikalyq jýrnalisterge kórsetýge múmkindik berý úshin onyń bólimsheleri Bahmýtty atqylaýdy toqtatty" degen aqparatty joqqa shyǵardy. Birneshe saǵattan keiin ol bul jai ǵana "áskeri ázil" ekenin aitty.
