Prezidenttiń tótenshe jaǵdai kezinde halyqtyń áleýmettik jaǵdaiyn birinshi orynǵa qoiǵany qýantady. Filosofiia jáne teologiia ǵylymdarynyń doktory Dosai Kenjetai osylai deidi, dep habarlaidy QazAqparat.
«Kúni keshe QR Prezidenti Qasym-Jomart Toqaev halyqtyń qaýipsizdigin saqtaýǵa tiisti quzyrly oryndarǵa naqty tapsyrmalar júktedi. Ásirese maǵan Prezidentimizdiń Almatydaǵy karantinge bailanysty aimaqtarǵa aǵylyp shyqqan jastar týraly aitqany qatty unady. Megopolisten aýylǵa eriksiz kelgen jumyssyz jastardy «Jol kartasy» boiynsha, aimaqtarda kóktemgi egis, qurylys jáne de basqa jumystarǵa aqy tólep tartý kerek, – dedi óz sózinde memleket basshysy. Óte durys aitady. 100 myńnan astam jas aýylda bosqa júrmeýi tiis. Bos adam qylmysqa barýy múmkin. Bolmasa bir nársege urynýy ábden yqtimal. Osy rette olardy aýyldy jerlerdegi aqyly jumysqa tartý kerek-aq. Bul óz kezeginde tabys taýyp, aýyl sharýashylyǵynyń damýyna da septigin tigizer edi», - deidi filosofiia jáne teologiia ǵylymdarynyń doktory.
Onyń sózine sensek, Memleket basshysy pandemiia dúrbeleńinde ultaralyq qatynas kún tártibinen syrǵyp túsip qalǵanyn jáne bul tynyshtyq aldamshy ekenin nazarǵa alǵan.
«Kóktemgi egis naýqanynda bolýy múmkin jerge, sýǵa talas daýlaryna qatysty da derekti dereý jetkizýdi quzyrly oryndarǵa júktedi. Bul da - óte ózekti dúnie. Eń bastysy - ultaralyq qatynasty jaqsartyp, daý-janjal týǵyzbaýdyń aldyn alý qajet. Taǵy bir unamdy tus retinde kún demei, tún demei demalyssyz qyzmet atqaryp júrgen dáriger, politsiia jáne basqa salanyń qyzmetkerlerine bir ailyq jalaqy kóleminde syiaqy berýge tapsyrma júktelgenin aitýǵa bolady. Eńbektiń osylaisha baǵalanǵany jaqsy. Qýantady. Sala qyzmetkerlerin jigerlendire túseri daýsyz», - dep atap ótti Dosai Kenjetai.
Eske sala keteiik, keshe Qasym-Jomart Toqaevtyń tóraǵalyǵymen tótenshe jaǵdai jónindegi memlekettik komissiianyń otyrysy ótken edi. Onda Prezident dárigerlerge alǵys aitty.
«Sizderge shynaiy alǵysymdy aitamyn. Úkimet pen ákimderge qosymsha qarjy taýyp, koronavirýsqa qarsy kúres jumystaryna tartylǵan dárigerlerge, politsiia qyzmetkerlerine jáne ózge de mamandarǵa 1 ailyq kóleminde syiaqy berýdi tapsyramyn», – dedi Memleket basshysy.
.jpeg)