Prezidenttiń saiasi reformalary qalai júzege asyrylýda? Bul suraqqa Memleket basshysynyń keńesshisi Erlan Qarin jaýap berdi, dep habarlaidy "Ult aqparat".
«2019 jyldyń jeltoqsan aiynda Ulttyq qoǵamdyq senim keńesiniń ekinshi otyrysynda QR Prezidenti Qasym-Jomart Toqaev birqatar mańyzdy saiasi bastamalardy jariia etip, atalǵan bastamalardy iske asyrý jóninde tiisti jospar qabyldanǵan bolatyn. Bul jumysqa Ulttyq keńes músheleri de at salysýda.
Sonymen, mańyzdy bastamalardyń biri beibit jinalystar týraly qazaqstandyq zańnamany ózgertý bolyp tabylady. «Beibit jinalystar uiymdastyrý jáne ótkizý tártibi týraly» jańa Zańnyń jobasy qazir Parlament Senatynyń qaraýynda.
«Qazaqstan Respýblikasyndaǵy sailaý týraly» Konstitýtsiialyq zańǵa tolyqtyrýlar engizý týraly» Konstitýtsiialyq zańnyń jáne «Saiasi partiialar týraly» Zańǵa ózgeris pen tolyqtyrýlar engizý týraly» Zańnyń jobalaryn Májilis ótken aptada maquldap, qazirgi kezde Parlament Senatynyń qaraýyna tústi» - dep jazady Erlan Qarin jelidegi paraqshasynda.
Sondai-aq, Erlan Qarin Parlamenttik oppozitsiia institýtyn engizýdi kózdeitin «QR Parlamenti jáne onyń depýtattarynyń mártebesi týraly» QR Konstitýtsiialyq zańyna tolyqtyrýlar engizý týraly» QR Zańynyń jobasy Parlament Májilisine engizilgenin jetkizdi.
«Qylmystyq kodekstiń 130-babyn kriminalsyzdandyrý jáne 174-bapqa ózgerister engizý boiynsha túzetýler Parlament Májilisiniń depýtattary bastamashylyq jasaǵan «Qazaqstan Respýblikasynyń keibir zańnamalyq aktilerine atqarýshylyq is júrgizý máseleleri boiynsha ózgerister men tolyqtyrýlar engizý týraly» Zań jobasyna engizildi. Qazirgi ýaqytta zań jobasy Parlament Májilisinde qaralyp jatyr.
Bas prokýratýra, UQK, IIM jáne Qarjy ministrligi «Qazaqstan Respýblikasynyń keibir zańnamalyq aktilerine qylmystyq jolmen alynǵan kiristerdi zańdastyrýǵa jáne terrorizmdi qarjylandyrýǵa qarsy is-qimyl máseleleri boiynsha ózgerister men tolyqtyrýlar engizý týraly» Zań jobasyn ázirledi. Atalǵan zań jobasy sheńberinde buryn QR QK 174-baby boiynsha sottalǵan jáne quqyq qorǵaý men arnaiy memlekettik organdardyń oń qorytyndysy bar bosatylǵandarǵa qatysty shekteýlerdi jeńildetýge baǵyttalǵan sharalar kózdelgen. Qazirgi ýaqytta Zań jobasy Parlament Senatynyń qaraýynda», - dep tolyqtyrdy ol.
